Dansa Suru Boek ne'ebe aprezenta hosi grupu dansa tradisionál sira iha kompetisaun dansa tradisionál Munisípiu Baucau, Sesta (02/08/2019). Imajen/Nelson de Sousa

BAUCAU, 03 agostu 2019 (TATOLI)-Komemorasaun loron konsulta popular ba dala-20 (30 agostu 1999-30 agostu 2019) ho Misaun INTERFET (International Force East Timor) iha Munisípiu Baucau, Sesta (02/08/2019), harame mós ho kompetisaun dansa tradisionál ne’ebé partisipa hosi grupu dansa tradisionais hosi Postu Administrativu neen (6) iha Baucau nia mahan.

Dansa Tradisionál. Imajen/Nelson de Sousa

Postu Administrativu neen ne’ebé hola parte iha area jurizdisaun Munisípiu Baucau nian mak hanesan Postu Administrativu Baucau Vila, Baguia, Laga, Quelicai, Vemasse ho Venilale.

Iha kompetisaun ne’e, grupu dansa tradisionál hosi Postu Administrativu Quelicai mak hetan primeiru lugar, segundu lugar  Baguia no terseiru lugar Venilale. Ho nune’e ne’e, Quelicai mak sei reprezenta Baucau ba tuir kompetisaun nivel nasionál iha Dili.

Dansa tradisionál ne’ebé grupu postu administrativu sira ne’e aprezenta hanesan, dansa suru boek, bidu, no tebe-tebe  tuir identidade postu administrativu ida-idak nian.

Presidente Komisaun Organizadora, Nuno N. de Almeida.

Prezidente Komisaun Organizadora, Nuno N. de Almeida,  hateten, grupu ne’ebé selesionadu hetan mellor kualifikadu sei ba partisipa iha kompetisaun nivel nasionál iha Dili.

Nuno N. de Almeida informa, prémiu ne’ebé atribui ba primeiru lugar ho osan $150, segundu lugar $125 no terseiru lugar $100.

Nia mós informa tan katak, iha jullu, foin lalais ne’e, hala’o uluk mós atividade iha nivel  postu administrativu sira kona-ba kompetisaun  poezia, pintura, no dansa tradisionál ho  fokál group, ne’ebé  involve komunidade, liuliu joven sira iha suku ida-idak iha postu administrativu neen nia laran iha Baucau.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here