Prezidente Repúblika (PR), Francisco Guterres Lú Olo, akompañadu hosi líder nasionál sira hanesan Marí Alkatiri, José Ramos Horta no Bispu Dioseze Maliana, Don Norberto do Amaral, ofisialmente halo abertura (loke) programa debate “Timor-Leste Lian Hosi Lian Laek”. Imajen Mídia PR

DILI, 3 agostu 2019 (TATOLI)—Prezidente Repúblika (PR), Francisco Guterres Lú Olo, ofisialmente halo abertura (loke) programa debate “Lian Hosi Lian Laek” ne’ebé realiza hosi Konferénsia Episkopál Timorense hodi selebra aniversáriu ba dala ruanulu resin lima Komisaun Justisa no Pás no selebra mós tinan rua-nulu Konsulta Populár ne’ebé hala’o iha Salaun Katedrál, Vila-Verde, Dili,  ohin.

Tema jerál ba programa debate refere mak “Justisa, pás no integridade iha konstrusaun no re-konstrusaun sosiedade Timor-Leste”.

“Onra boot mai ha’u bele mai partisipa iha lansamentu programa debate abertu ho tema: ʺLan Hosi Lian Laekʺ, ne’ebé organiza hosi Konferénsia Episkopál Timorense hodi selebra aniversáriu ba dala rua-nulu resin lima Komisaun Justisa no Pás, no atu selebra mós aniversáriu ba dala ruanulu Konsulta Popupár,” tenik PR Lú Olo iha nia diskursu.

Partisipante programa debate “Timor-Leste Lian Hosi Lian Laek”. Imajen Mídia PR

Iha biban ne’e, Xefi Estadu konvida ema hotu atu hanoin saida mak lei inan hateten kona-ba Estadu Timor-Leste (TL), iha ne’ebé artigu primeiru ko’alia Repúblika Demokratika Timor-Leste (RDTL) katak estadu ida ne’ebé iha respeitu ba dignidade ema hotu nian.

“Ne’e dehan katak ita-nia estadu bainhira respeita sidadaun sira-nia dignidade, nia estadu ida ho karáter demokrátiku. Bainhira estadu ida laiha preokupasaun hodi harii kondisaun atu garante katak nia sidadaun sira bele ezerse sira-nia direitu, ka iha asesu ba sira-nia direitu báziku, estadu ida ne’e la respeita dignidade sidadaun sira-nian. Estadu ida ne’e laiha karáter demokrátiku,” dehan PR Lú Olo.

Partisipante programa debate “Timor-Leste Lian Hosi Lian Laek”. Imajen Mídia PR

Ema númeru ida iha Timor-Leste ne’e haktuir, iha tinan hitu-nulu (70) Deklarasaun Universál Direitu Umanu ne’ebé Timor-Leste subskreve iha dokumentu ida ne’ebé reflete ema-nia hanoin no nia artigu primeiru kedas dehan, ema hotu moris livre hanesan, dignidade no direitu.

Nia hatutan, bazeia duni ba Deklarasaun Universál Direitu Umanu mak uluk ema halo denúnsia ba okupasaun mai Timor-Leste ne’ebé la respeita ema nu’udar umanu.

Maibé, ikus, Timor-Leste hamriik hanesan nasaun, hatuur iha Konstituisaun, hodi harii estadu ida Direitu Demokrátiku, estadu ida ne’ebé governante sira preokupa ho sidadaun sira-nia moris di’ak, moris lor-loron hanesan, asesu ba bee-moos, edukasaun ida ho kualidade, ba serbisu saúde di’ak.

“Haree ba terus ne’ebé povu sira hasoru, iha tinan 1970, iha Vaticano, Amu Papa Paulo VI simu dirijente sira hosi lutas armada Guiné Bissau, Angola no Moçambique nian, maski iha konkordata ida ho Portugal. Ho nune’e, Igreja rekoñese direitu povu sira-nian ba ukun-án,” nia haktuir.

Liuhosi encíclicas no pronunsiamentu pontifísiu, doutriña sosiál Igreja ko’alia kona-ba asuntu fundamentál sira nu’udar ema-nia dignidade, nia direitu no liberdade sira, ko’alia kona-ba família no partisipasaun responsável kada ema ida-idak iha moris sosiál; sistema ekonómiku no inisiativa privada, kna’ar Estadu nian.

“Iha tinan ida ne’e, Organizasaun Mundiál Traballu (OIT) selebra sira-nia aniversáriu ba dala atus ida ho preokupasaun boot kona-ba promove dame, bem komun no promove mós respeitu ba prinsípiu justisa, subsidiaridade, bens natureza nian, prezerva meiu-ambiente no solidariedade,” nia esplika.

Tuir Lú Olo, Komisaun Justisa no Pás harii iha tinan rua-nulu resin lima (25) ba kotuk, nu’udar mekanizmu ida hodi hatutan Doutriña Sosiál Igreja nian. Doutriña ida ne’ebé hatuur iha valór no prinsípiu no sai hanesan ai-riin ba estadu ne’ebé harii dadauk. Estadu ida ne’ebé iha respeitu ba dignidade ema ida-idak nian.

Timor-Leste nia luta ba libertasaun nasionál maski ho diversidade barak, kontinua to’o iha ukun-án, to’o iha loron ne’ebé, liuhosi referendu tinan rua-nulu ba kotuk, povu Timor-Leste hamriik hodi hili nia dalan rasik ba ukun rasik-án ne’ebé sura mós prezensa hosi Igreja Katólika nian hodi fó mahon ba ema hotu hodi hasai todan ne’ebé ema hotu sente.

“Ita labele haluha masakre ne’ebé akontese iha Igreja Liquiçá no Igreja Avé Maria Suai, iha 5 ka 6 abríl 1999. Ohin loron, dala ida tan, iha prosesu independénsia, ita sura nafatin apoiu hosi Igreja ho nia valór sira,” tenik Xefi Estadu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here