Prezidente Repúblika (PR), Francisco Guterres Lú Olo. Imajen Mídia PR

DILI, 3 agostu 2019 (TATOLI—Prezidente Repúblika (PR), Francisco Guterres Lú Olo, husu ba polítiku sira hotu atu haree ba realidade ne’ebé dadaun ne’e povu sira infrenta.

Nia afirma, líder polítiku hotu labele ko’alia mamuk de’it, tanba to’o oras ne’e povu barak mak seidauk asesu ba bee-moos no eletrisidade.

“Ita labele ko’alia mamuk de’it! Líder polítiku sira tenke preokupa ho númeru aas hosi ita-nia populasaun ne’ebé la asesu ba bee-moos. Ne’e duni, lor-loron tenke la’o dook. Dala barak ho kabun mamuk, ho kolen, hodi buka bee. Bainhira ita loke dalan ba injustisa, ita sei loke mós dalan ba sosiedade ida ne’ebé violenta, sosiedade ida ne’ebé neineik, ema sira sei lakon sira-nia lian, tanba sente exkluídu,” dehan PR Lú Olo iha nia diskursu bainhira partisipa iha serimónia abertura ba programa debate “Lian Hosi Lian Laek” ne’ebé hala’o iha Salaun Katedrál, Vila-Verde, Dili, ohin.

Lú Olo dehan, ema hotu moris hanesan tanba nasaun adopta sistema demokasia. “Ita hotu moris hanesan, tan ne’e, ita labele hetan diskriminasaun. Demokrasia signifika inkluzaun, katak labele iha dezigualdade,” nia esplika.

Nia hatutan, atu dignifika sidadaun sira-nia moris tenke halo kompromisu ida hodi funu hasoru ki’ak liuhosi polítika ho objetivu atu hamenus ki’ak.

“Ita tenke kestiona tanba saida mak sidadaun sira, nu’udar ema umanu bele lakon sira-nia lian iha sira-nia estadu rasik,” dehan ema númeru ida iha Timor-Leste ne’e.

Lú Olo informa, bainhira iha Estadu Direitu Demokrátiku ida, sidadaun sira lakon sira-nia lian, hatudu katak estadu ida ne’e la’ós ona Direitu Demokrátiku. Ne’e ditadura! Katak, governante ka reprezentante sira hosi estadu haluha ona sira reprezenta sidadaun sira maibé reprezenta sira-nia án rasik fali.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here