BAUCAU, 02 agostu 2019 (TATOLI)-Reprezentante Veteranu Munisípiu Baucau, Fernando Gusmão ‘Bere Du’u’ ho António da Costa ‘Derok-Masin’, rekoñese prosesu luta ba ukun rasik aan la’ós fasil, maibé sakrifika ema barak nia terus no mate hodi liberta liuhosi konsulta popular, 30 agostu 1999.
Notísia Relevante : Baucau Komemora Loron Konsulta Populár
Veteranu Frente Armada hosi Munisípiu Baucau, hato’o asuntu ne’e bainhira prezide reflesaun hodi komemora tinan 20 loron konsulta popular (30 agostu 1999- 30 agostu 2019), ohin, iha Baucau.
“Prosesu luta hosi tinan 1975 la’ós fasil hodi mai to’o 1999 loron 30 agostu referendu, ne’ebé sosa ho ran no ruin,” afirma veteranu Bere Du’u.
Nia konta tuir katak, durante iha ai-laran nia hanesan soldadu sempre prontu hodi submete ba kualkér desizaun ne’ebé fó sai hosi Komandante ein–Xefe FALINTIL, Kay Rala Xanana Gusmão atu hasoru inimigu sira.
“Dalaruma iha momentu udan iha tempu kalan la’o ita toba de’it iha tahu laran ne’ebé difisil loos,” Bere Du’u konta tuir ho triste.
Veteranu António da Costa ‘Derok-Masin’ apela ba foin-sa’e sira atu hatene istória loloos, hahú hosi prosesu luta to’o libertasaun nasionál, 1975-1999.
Iha parte seluk, nia mós husu ba juventude iha territóriu atu evita aan hosi konflitu no krime tanba sei afeta ba instabilidade nasionál, maibé juventude sira tenke fó kontribuisaun másimu ba prosesu dezenvolvimentu.
“Estuda makaas mak save ba aban-bainrua nian hodi lori no dezenvolve nasaun ne’e ba oin,” afirma Derok-Masin.
Partisipante joven, Mario de Sousa, apresia ho reflesaun ne’e tanba bele hatene istória loloos hosi Veteranu sira hodi fó valor ba prosesu luta ba ukun rasik aan.
Jornalista : Nelson de Sousa
Editór : Francisco Simões
