Ministra Edukasaun Juventude no Desportu, Dulce de Jesus Soares. Imajen dok. TATOLI

DILI, 2 agostu 2019 (TATOLI)—Ministra Edukasaun Juventude no Desportu (MEJD), Dulce de Jesus Soares, informa Governu Timor-Leste (TL) liuhosi rezolusaun ne’ebé hasai ona hosi Konsellu Ministru preparadu ona sai uma-na’in ba jogu Komunidade Nasaun Ko’alia Lian Portugeza (CPLP-sigla Portugés).

Bazeia ba reuniaun ne’ebé MEJD durante fulan hirak ba kotuk hala’o ona ho membru CPLP tomak hetan ona apresiasaun hosi apoiu Timor-Leste bele sai uma-na’in hodi lidera jogu CPLP ne’ebé sei hala’o jullu tinan oin.

“Foin dadauk ha’u ba tuir enkontru entre Ministru Juventude Desportu CPLP. Enkontru refere importante tebes no Timor-Leste mak sei sai uma-na’in ba jogu CPLP nian iha tinan 2020 no hetan apresiasaun hosi membru CPLP tomak,” haktuir Dulce ba jornalista iha Jináziu Dili, ohin.

Lee mós:

MEJD Hala’o Enkontru Preparasaun Ba Jogu CPLP

TL Hetan Rezultadu Pozitivu Sai Uma Na’in ba Jogu Desportivu CPLP

MEJD Estabelese Komisaun Interministeriál Ba Atividade Konferénsia Desportu CPLP

Kántigu “Unidos Somos Um“ Sai Múzika Espesiál Desportiva CPLP XII

Iha eventu refere, nia tenik, Timor-Leste tenke organiza atleta hosi nasaun ualu ne’ebé hamahan-án iha organizasaun CPLP ne’ebé kada nasaun atleta sia-nulu (90) maka sei reprezenta.

Nia hatutan, iha soru-mutu refere sira diskute mós kona-ba nasaun CPLP hirak ne’ebé finansiamentu ladún sufisiente hodi buka dalan atu partisipa mós iha eventu importante ne’e.

“Ita haree nasaun hirak ne’ebé ekonomia ladún sufisiente ami ko’alia buka dalan oinsá atu sira mós partisipa hotu. Tanba ne’e, Angola mak iha ekonomia ne’ebé di’ak liu entaun sira mak sei tulun fali nasaun sira hanesan Guiné Bissau, Cabo Verdo no São Tome e Príncipe hodi partisipa mós iha eventu ne’e,” katak Dulce.

Relasiona ho fasilidade infraestrutura hodi realiza eventu ne’e, Dulce garante fulan ikus tinan ida ne’e Governu bele finaliza ona reabelitasaun fatin balun hanesan Estádiu Gleno no Jináziu Dili.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here