Vise-Governadór Banku Central Timor-Leste (BCTL),Venancio Alves Maria. Imajen /Jogerjo Guterres.

DILI, 02 agostu 2019 (TATOLI) – TIMOR Gás no Petróleu (GAP), Empreza Públika ho Banku Sentrál Timor-Leste (BCTL-sigla portugés) halo akordu ida, regularmente Timor GAP fornese dadus ba BCTL sobre rezultadu investimentu Fundu Petrolíferu.

Akordu ne’e atu haree no análiza kapasidade Timor GAP sobre retornu no jurus ne’ebé tenke selu ba BCTL.

“Investimentu ida iha merkadu internasionál agora mós risku, desizaun investimentu iha tiha ona, katak loron ida bele lakon no loron ida bele manán”, Vise-Governadór BCTL, Venancio Alves Maria, bainhira hatán pergunta, kuandu TIMOR GAP la konsege selu tuir akordu ne’ebé termina.

Ba jornalista sira bainhira divulga rezultadu trimestrál fundu petrolíferu iha edifísiu BCTL ohin, nia dehan investimentu hosi montante millaun $650 ne’ebé sosa asaun ConocoPhillips ho Shell Energy, empreza estatál ne’e sei selu totál retornu hamutuk millaun $518 to’o tinan 18.

“Pagamentu dahuluk sei halo iha 10 abríl 2027 ho totál millaun 116.8, ne’e tinan ualu mak hahú selu”, katak nia.

Nia hatutan: “Millaun 116.8 ne’e akumuladu husi montante millaun 274, aumenta millaun 650, balansu ne’e ita sura hahú husi ne’ebá mak kada tinan sira sei selu 116.8 ne’e inklui prinsipál ho nia jurus pursentu 4.5”.

Venancio esplika montante millaun $274, ne’e retornu ne’ebé mak BCTL rekoñese durante períodu grasa tinan ualu.

“Millaun 274 ne’e nia lukru (interest) ne’ebé iha termu kontabilidade accrued (rekoñese mas seidauk selu). Ita rekoñese iha ita-nia livru mak millaun 274 durante tinan ualu”.

Vise-Governadór ne’e dehan osan hamutuk millaun $650 ne’ebé selu tiha ona ba kompaña ConocoPhillips no Shell ne’e, Fundu Petróleu konsidera hanesan investimentu iha TIMOR GAP no hola parte iha totál fundu ida ne’e nafatin.

Nia esplika millaun $650 ho ninia jurus kada tinan porsentu 4.5 ho períodu grasa tinan ualu.

Períodu grasa ne’e katak durante tinan ualu Fundu Petróleu rekoñese de’it hanesan rekorda nafatin iha kontabilidade, katak jurus ne’ebé sei simu hosi TIMOR GAP kontinua akumula maibé hahú selu depois tinan ualu, 2027.

Ba períodu ida ne’e, nia afirma Fundu Petróleu rekoñese ona maizumenus millaun $6.5 hanesan reseita. Maibé Timor GAP seidauk selu depois períodu grasa maka selu montante sira ne’ebé akumula.

Vise-Governadór ne’e subliña, totál períodu ne’e tinan 18 katak hahú iha loron 10 abríl 2019 to’o loron 10 abríl 2036 no espera to’o tinan 2037 ne’e Timor GAP selu hotu ona. “Ida ne’e iha akordu jestaun ho Ministériu Finansa”, akresenta.

Jornalista: Antónia Gusmão
Editora: Maria Auxiliadora

HAKEREK NO HATÁN

Please enter your comment!
Please enter your name here