Juiz Administradór Distritál Dili, José Maria da Costa. Imajen/Domingos Peidade Freitas

DILI, 02 agostu 2019 (TATOLI) – Juiz Administradór Distritál Dili, José Maria da Costa, informa, Tribunal Distritál Dili (TDD) presiza tan juizés no ofisiál justisa sira hodi bele atende públiku ho di’ak.

Notísia Relevante : Aban, Tribunal Hahú Ferias Judisiáriu

“Ha’u hanoin agora daudauk krime ne’ebé rejista iha TDD liuliu ba kazu krime hamutuk 2.500 no kazu sivíl hamutuk 800, total hosi kazu rua nee bele dehan katak to’o ona 3.300,” informa José Maria da Costa, ohin, ba Ajénsia  TATOLI, iha TDD.

Númeru ba kazu nee mós konforma hosi Prezidente Tribunal Rekursu (PTR) katak entre Tribunal Distritál Dili, Tribunal Distritál Suai no Tribunal Distritál Baucau, fó sai katak kazu pendente  aas liu mak Tribunal Distritál Dili.

José Maria da Costa mós esplika katak númeru ofisial justisa mós la sufisiente, maske iha TDD iha seksaun ne’ebé mak kompletu liu mak parte kriminál no seksaun sentrál. Maibé, espera katak iha futuru mai bele tau ofisiál justisa ida ba juis ida hodi bele hala’o servisu di’ak liu tan.

Nia hatutan, agora daudaun mós kolega juis estájiu na’in tolu (3) ne’ebé mak hala’o hela estájiu iha Tribunal Distritál Dili, no agora liga ba juis ne’ebé iha Tribunal Distritál Dili la sufisiente, presiza tan apoiu.

José mós esplika, kona ba sirkulár ne’ebé mak sai antes tiha ona, liga mós ho movimentasaun iha tinan nee, antes nee, iha juizés hamutuk na’in 34 maibé na’in ida mate no kolega na’in lima ba tiha Tribunal Rekursu (TR).

Iha Tribunal Distritais sira nee, José hatutan, hamutuk juizés na’in 28 mak koloka iha Tribunal Distritál Dili, Tribunal Distritál Baucau no Tribunal Distritál Suai.

“Foin daudaun mós iha sirkulár ida ne’ebé mak sai katak iha fulan Setembru aumenta ida tan hamutuk na’in 14,” tenik José Maria da Costa.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here