Diretór Jerál SEFOPE, Paulo Alves, asina nota hodi fó apoia rihun 900 resin hodi fortalese sentru fomasaun sira. Foto/SEFOPE.

DILI, 02 agostu 2019 (TATOLI)-Diretór Jerál Sekretáriu Estadu Formasaun Profisionál no Empregu (SEFOPE), Paulo Alves, hatete SEFOPE apoia orsamentu hamutuk rihun $900 hodi fortalese sentru formasaun sira iha munisípiu 12 exetu Região Administrativa Especial Oe-Cusse-Ambeno (RAEOA) nune’e kontinua introdús sistema formasaun iha Timor-Leste ba joven sira ho kualidade atu nune’e bele asesu ba postu traballu.

“Ohin ita selebra kontratu entre SEPFOPE ho sentru formasaun sira ne’ebé maka durante ne’e hetan insentivu husi SEFOPE rasik ho totál orsamentu hamutuk 900 mil e tal dólar ne’ebé maka atu kapasita joven sira iha área formasaun profisionál”, dehan Paulo Alves hafoin asina akordu ho sentru formasaun sira iha salaun SEFOPE Kaikoli, ohin.

Tuir nia orsamentu ne’ebé maka SEFOPE apoia ba sentru formasaun sira ne’e inklui mós osan ba programa SEFOPE nian ne’ebé hanaran estájiu nasionál (esperiénsia serbisu nian) ba fulan neen. Programa estájiu nasionál ne’e iha ema hamutuk na’in-500.

Diretór Jerál ne’e dehan orsamentu ne’e mai husi Fundu Kapitál Dezenvolvimentu Umanu (FDCH).

Iha fatin hanesan, Diretór Sentru Formasaun Dom Bosco Comoro, Padre John Laba SDB, sente kontente ho apoiu husi SEFOPE rasik no husu obrigadu bele apoia ona sentru formasaun Dom Bosco Comoro nune’e sei tulun sentru ne’e ho di’ak hodi kapasita joven sira.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here