Ekipa Tranzisaun lidera hosi asesór prinsipál Ministériu Finansa, Helder Lopez (imajen liman loos), hala’o vizita ba Postu Integradu Sakato, RAEOA. Imajen Tatoli/ Cipriano Colo

OÉ-CUSSE, 2 agostu 2019 (TATOLI)—Ohin loron, loron ikus misaun Ekipa Tranzisaun hosi Governu Sentrál iha Rejiaun Administrativa Espesiál Oé-Cusse Ambeno (RAEOA).

Iha loron ne’e, ekipa ne’e fahe ba grupu rua. Grupu primeiru lidera hosi Xefe Ekipa Tranzisaun, Helder Lopez, ne’ebé hala’o vizita ba Hotel Ambeno, Sentru Elétrika Inur Sakato, hasoru malu ho populasaun afetadu ba konstrusaun estrada iha Sakato no Postu Integradu Sakato.

Lee mós:

Ekipa Tranzisaun Konklui Avaliasaun iha RAEOA

Ekipa Tranzisaun Simu Planu Estratéjiku RAEOA 2019-2023

Laiha Koordenasaun, Alkatiri Konsidera Ekipa Tranzitóriu Hanesan Surpreza

Hafoin vizita, Helder Lopez hateten, hosi vizita ne’e, ekipa téknika fornese duni informasaun. Maibé, ekipa mós identifika katak iha aspetu balun ne’ebé presiza tau iha relatóriu liliu oinsá atu rekomenda ba Prezidente Autoridade foun atu bele tau atensaun bainhira hahú hala’o kna’ar iha RAEOA iha mandatu tuir mai.

Helder fó ezemplu kona-ba iha Postu Integradu Sakato ne’ebé pesoál sira informa kona-ba manutensaun ba fasilidade, edifísiu, overtime no seluk-tan.

“Ezijénsia hosi pesoál sira maka tenke halo manutensaun ba CCTV, Karreta X-Ray, reabilitasaun edifísiu, ovetime no seluk-tan ne’ebé la funsiona dezde 2015 to’o agora,” hateten Helder iha Postu Integradu Sakato, RAEOA, ohin.

Helder informa katak informasaun sira ne’e sei tau hamutuk iha relatóriu Ekipa Tranzisaun nian, ne’ebé sei hato’o ba Primeiru-Ministru.

Nune’e mós, grupu seluk ne’e lidera hosi Komisáriu Komisaun Funsaun Públika (KFP), António Freitas. António hateten grupu ne’e hala’o vizita ba edifísiu estadu sira, liliu ba Sekretáriu Rejionál sira atu justifika deklarasaun no informasaun sira ne’ebé loron rua ba kotuk sira aprezenta iha enkontru ho Prezidente Autoridade Sesante, Marí Alkatiri no mós Sekretáriu Rejionál sira.

“Rezultadu vizita ne’e kapa’as tebe-tebes, tanba antes ne’e sira deklara verbálmente no defaktu ami bele rekolla dokumentu sira no justifika duni,” António haktuir.

Kona-ba lakuna, Komisáriu KFP ne’e lakohi fó sai tanba ida ne’e la’ós atu halo auditória, nune’e sei bele hatene liu-tan iha relatóriu finál.

Iha tuku 15:00 otl, Xefe Ekipa Helder Lopez ho Komisáriu António mós hasoru malu ho Prezidente Autoridade Interinu, Arsénio Paixão Bano, hodi konfirma kona-ba dadus hotu ne’ebé ekipa presiza.

Tanba ne’e, hafoin enkontru, Arsénio esklarese, autoridade kolabora di’ak tebe-tebes ho Ekipa Tranzisaun atu bele fornese hotu dokumentu sira ne’ebé ekipa ne’e rasik presiza, nune’e bele kompleta di’ak liu-tan relatóriu avaliasaun ba Primeiru-Ministru, Taur Matan Ruak.

“Ha’u fó ona orientasaun ba ha’u-nia kolaboradór sira liliu Sekretáriu Rejionál sira, atu prepara informasaun sira ne’e iha USB no ha’u hasoru ona Xefe Ekipa Tranzisaun no sei entrega molok ekipa fila ba Dili,” Arsénio informa.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here