Sesaun plenária iha Parlamentu Nasionál. Imajen dok. Tatoli

DILI, 2 agostu 2019 (TATOLI) – Vise Prezidente Parlamentu Nasionál, Luís Roberto informa agora dadauk Parlamentu Nasionál (PN) hahú deskute ajenda ba loron Konsulta Populár 30 Agostu.

“Eventu iha Parlamentu mak meza redonda líder bankada sira, lansamentu fotografia, no kontribuisaun livru deputadu sira ne’ebé ko’alia portugés di’ak komesa hosi pasadu to’o agora”, tenik Luis Roberto ba jornalista sira iha PN, sesta ne’e

Iha ámbitu komemorasaun tinan 20 Konsulta Populár nian, PN sei simu bainaka espesiál balun, tanba ne’e Luís Roberto dirije enkontru ida hodi fó kompeténsia ba Sekretariadu PN, hodi halo preparasaun ajenda ne’ebé atu simu bainaka espesiál sira hosi rai-li’ur.

“Ami fó ona servisu ba Sekretáriu Jerál Parlamentu ho ninia ekipa sira hodi halo preparasaun hodi simu bainaka espesiál balun”, nia akresenta.

Nia dehan, ajenda diária PN semana ne’e laiha tanba sei foka liu-ba ajenda Konsulta Populár nian.

Luís Roberto subliña, kona-ba bainaka espesiál seidauk bele anúnsia.

Tuir ajenda ne’ebé fó sai iha Portál Ofisiál Governu katak, bainaka espesiál to’o iha Timor-Leste hahú hosi loron 26, 27 no 28 agostu.

Nune’e mós, Sekretáriu Jerál Organizasaun Nasaun Unida (ONU), António Guterres, sei hato’o diskursu onra iha loron 30 agostu iha PN, tuku 09.00 otl.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here