Mapa RAEOA. Imajen IPG Timor-Leste

OÉ-CUSSE, 2 agostu 2019 (TATOLI)—Pesoál sira hosi Postu Integradu Sakato kompostu hosi Karantina, Alfándega, Migrasaun no Unidade Patrolallamentu Fronteira (UPF) preokupa ho kondisaun serbisu no over time ne’ebé dezde tinan 2015 la funsiona.

Preokupasaun ne’e hato’o hosi Supervaizór Karantina Rejiaun Administrativa Espesiál Oé-Cusse Ambeno (RAEOA), Marçal da Costa Soares ‘Teki Lorosae’ bainhira Ekipa Tranzisaun hosi Governu Sentrál hala’o vizita ba Postu Integradu refere iha sesta (02/8).

Marçal informa, durante ne’e, sira hala’o serbisu tuir Lei, maibé dezde 2015 to’o oras ne’e over time laiha.

Aleinde ne’e, nia preokupa mós ho kondisaun serbisu hanesan edifísiu ne’ebé kalén nakloke kauza hosi anin iha tinan 2017 maibé to’o oras ne’e seidauk reabilita no iha tempu udan, udan been tama serbisu fatin.

Nunee mós, mákina X-Ray no karreta ne’ebé iha hela maibé laiha pesoál ne’ebé bele halo operasaun atu oinsá halo check in ba sasán ne’ebé tama-sai. Aleinde ne’e, CCTV mós aat, inklui AC no seluk-tan.

“Ami serbisu tuir oras hahú hosi segunda to’o sesta inklui sábadu no domingu ho loron feriadu sira hanesan Natál, Tinan Foun, Páskua, loron nasionál sira, maibé osan ba over time laiha,”  nia haktuir.

Iha fatin hanesan, Koordenadór Postu Integradu Sakato, Salvador Amaral rekoñese mós katak durante ne’e osan ba overtime laiha no laiha manutensaun ba fasilidade ne’ebé kuaze hotu-hotu la funsiona inklui impresora. Maski iha kada fulan nia rohan sempre halo relatóriu hodi hatama ba RAEOA maibé to’o oras ne’e laiha rezultadu.

Nia informa, babain relatóriu ne’e hatama ba parte finansa Zona Espesiál Ekonomia Sosiál Merkadu (ZEESM) maibé informasaun ne’ebé nia rasik simu katak hein de’it prosesu.

Relasiona ho kestaun ne’e, bainhira TATOLI konfirma ho Prezidente Autoridade Rejiaun Administrativa Espesiál Oé-Cusse Ambeno interinu, Arsénio Paixão Bano hateten kona-ba Migrasaun ne’ebé seidauk hetan osan ba overtime ne’e responsabilidade Governu Sentrál.

Kona-ba Karantina no seluk-tan, Arsénio rekoñese katak ne’e pertense ba responsabilidade RAEOA, maibé nia rasik tenke check fila fali rejime RAEOA katak bele atribui osan ka lae, tanba distánsia fatin serbisu entre Sakato ho Oé-Cusse Vila besik hela.

Iha parte seluk, kona-ba reabilitasaun edifísiu, Prezidente interinu ne’e mós tenke check tanba ida ne’e tama iha planu ka lae.

Kona-ba pesoál Migrasaun, Alfándega no UPF, pesoál Karantina ne’ebé halo serbisu hamutuk na’in sanulu destakadu iha Sakato, Oesilo, Pássabe no Portu Oé-Cusse.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here