Traballadór sira halo hela reabilitasaun iha Jardín 5 de Maio, Colmera. Imajen/Florencio Ximenes.

DILI, 02 agostu 2019 (TATOLI)-Ministériu Turizmu, Komérsiu no Indústria (MTKI) halo observasaun direita ba reabilitasaun sítiu turístiku sira iha Dili hodi husu kompañia sira finaliza lalais, molok loron konsulta populár ba dala-20 (30 Agostu 1999-30 Agostu 2019) no misaun INTERFET nian.

“Ita koordena ho kompañia sira atu finaliza lalais reabilitasaun ho kualidade di’ak hodi hatudu imajen kapitál nasaun nia ba bainaka sira”, Diretór Jerál Turizmu, José Filipe Dias Quintas, hatete bainhira halo observasaun ba reabilitasaun jardín 5 de Maio, ohin.

Nia dehan, MTKI halo koordenasaun ho Ministériu Estatál no Autoridade Munisípiu Dili hodi akompaña nafatin kompañia sira atu aselera prosesu reabilitasaun sítiu turístiku hanesan jardín Largo Lecidere, Monumentu 12 Novembru, área Kristu Rei no João Paulo II.

“Ita haree kompañia sira besik atu finaliza ona tanba balun falta pinta parede sira, hadi’a simentu balun nakfera no halo hela instalasaun ba liña eletrisidade”, katak.

Tanba ne’e, nia ho esperansa boot katak, molok tama 30 agostu reabilitasaun ba sítiu sira iha kapitál Dili bele konklui ona atu imajen kapitál nasaun bele furak liután.

Iha fatin hanesan, Diretora Kompañia ERVER, Lda, Amélia de Jesus Pereira, promete iha 25 agostu sei finaliza reabilitasaun jardín 5 de Maio hodi entrega ba Governu.

Nia salienta kustu ba reabilitasaun jardín 5 de Maio ne’e ho totál orsamentu rihun U$16-resin.

“Ami besik hotu ona maizumenus iha loron 25 agostu ami finaliza ona reabilitasaun hodi entrega ona ba Governu, tanba falta pintura parede, kuda ai-funan no hadi’a fatin air mancur”, katak.

Orsamentu ba reabilitasaun sítiu turístiku sira iha kapitál Dili no foho Ramelau, Bee-Manas Marobo hamutuk rihun U$400.

Notísia relevante : MTKI Esforsu Finaliza Reabilitasaun Sítiu Turístiku Molok 30 Agostu

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here