Diretór Jerál Bee no Saneamentu, Gustavo da Cruz. Imajen/Florencio Miranda Ximenes.

DILI, 02  agostu 2019 (TATOLI)-Ministériu Obra Públika (MOP) hahú diskute ho kompañia telekomunikasaun Telkomcel atu dijitaliza sistema pagamentu bee-moos.

Diretór Jerál Bee no Saneamentu, Gustavo da Cruz, dehan MOP ho Telkomcel iha faze diskusaun téknika atu  dezenvolve sistema dijitalizasaun ba pagamentu bee-moos hodi hasa’e reseita bee nian.

“Konsumidór barak asesu ona ba bee no sira hakarak selu, maibé sira sei forma iha banku mak atu selu,” Diretór Gustavo, informa iha Novu Turizmu, ohin.

“Sistema dijitalizasaun ne’e atu kontribui ba reseita Estadu liuhusi fasilita konsumidór sira atu selu ho lais.”

Tanba ne’e, nia dehan Governu liuhusi DGAS-MOP esforsu atu iha tempu badak  finaliza diskusaun iha kestaun téknika no hein Ministru Obra Públika (MOP), Salvador Eugénio Soares dos Reis Pires,  halo aprovasaun bele hahú ona dijitalizasaun atu fasilita lais konsumidór sira halo pagamentu.

Antes ne’e, Diretór Ezekutivu Telkomcel iha Timor-Leste, Yogi Rizkian Bahar, akompaña husi tékniku sira aprezenta oinsá halo “Dijitalizasaun ba Sistema Pagamentu Bee” ba Ministru Obra Públika (MOP) Salvador Eugénio Soares dos Reis Pires.

Dijitalizasaun ba sistema pagamentu bee ne’e sei simplifika sistema no fasilita Diresaun Jerál Água no Saneamentu (DGAS) hodi hatama dadus ho integradu liuhosi aplikasaun DGAS hodi kontrola kontadór  bee husi sentrál DGAS nian.

Tuir tarefa ne’ebé mak iha ho kategoria kliente doméstika (uma hela fatin) konsumu ka gastu to’o litru 14.000 tarefa ba bee-moos litru 1.000 mak $0,20, liu litru 14.000 tarefa ba bee-moos litru 1.000 mak $0,40, kliente sosiál (fontenáriu/torneira públiku, ba bee-moos litru 1.000 mak $0,10 no sosiál (igreja, meskita, pagoda, ospitál, eskola no seluk tan,) tarefa ba bee-moos litru 1.000 mak $ 0,15.

Polítika Governu implementa tarefa bee-moos  hanesan kontribuisaun  populasaun atubele sente sai na’in ba bee no iha impaktu pozitivu.

Bainhira selu ona tarefa bee-moos mak populasaun bele iha konsiénsia atu uza ho di’ak, nune’e mós ema seluk bele hetan bee-moos.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here