Prezidente Konferénsia Episkopál, S. Eminénsia Reverendísimu Amu Bispu Don Norberto do Amaral. Imajen Tatoli/Egas Cristóvão

DILI, 2 agostu 2019 (TATOLI)—Prezidente Konferénsia Episkopál, Bispu Don Norberto do Amaral, hateten domin ba Timor-Leste (TL) tenke boot liu buat hotu-hotu, tanba ultrapasa terus ne’e liuhosi raan barak mak naksulin iha fati-fatin.

Tuir Nai-Lulik ne’e katak esforsu timoroan hotu hakotu ona terus iha 1999 no agora lori Timor-Leste ba oin, ba dalan prósperu.

“Mensajen ba Konsulta Populár mak ne’e, hakarak ka lakohi ai-rin istória ita-nian, ne’e duni ita fó respeitu ba ita hotu nia esforsu. Loke ita-nia neon no laran hodi simu eventu ida ne’e hodi refleta buat ne’ebé liu ne’e lori ba aban-bainrua,” Bispu Norberto, ko’alia iha Palásiu Governu, sesta ne’e.

Bispu ne’e hateten, timoroan hotu tenke hadomi malu no hametin estabilidade seguransa hodi sarani no povu hotu moris iha sosiedade bele hakmatek.

“Labele ida de’it. Hotu-Hotu tenke hadomi rai ida ne’e. Ita terus no manán tiha ona, hakarak ka lakohi, tau iha ita-nia liman laran ne’e,” Líder Igreja Katólika ne’e fó hanoin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here