Diretór Jerál Bee no Saneamentu, Gustavo da Cruz. Imajen/Florencio Miranda Ximenes.

DILI, 02 Agostu 2019 (TATOLI)-Diresaun Jerál Bee no Saneamentu (DGAS, sigla portugés) iha Ministériu Obra Públika (MOP) monta ona kontadór 3000 ba umakain sira iha kapitál Dili.

“Ami nia ekipa task force monta ona kontadór 3000 no sei kontinua monta ba umakain sira ne’ebé seidauk iha kapitál Dili,” Diretór Jerál Bee no Saneamentu, Gustavo da Cruz, hatete iha Novo Turismo, Licidere, ohin.

Diretór Gustavo dehan monta kontadór ne’e meiu ida atu abitante sira labele uza bee la tuir nesesidade hodi fó implikasaun ba viziñu sira la asesu bee. “Ita monta kontadór sira para halo poupansa ba bee”, katak.

Nia dehan, DGAS kontinua halo esforsu atu mellora kanalizasaun bee hodi abitante hotu bele asesu tanba sistema bee komplikadu loos iha terrenu ne’ebé tenke rezolve faze pur faze.

Enkuantu, konsumidór dada bee ilegál, Diretór Jerál dehan: “Kuaze iha ilegál lubuk ida, maibé ami tenta legaliza ligasaun sira ne’e atu rejistu hodi kontribui reseita Estadu nian”.

Tuir dekretu lei númeru 3/2004 no Diploma Ministeriál 1/2004 katak konsumidór ne’ebé dada bee ilegál aplika multa $50 ate $1000 no abitante atu halo ligasaun foun bee ba umakain selu U$55.

“Ami rejistu, prienxe formuláriu pois bá selu iha banku hodi ekipa SAS atu bá halo instalasaun ho distánsia metru neen de’it, liu ida ne’e selu liu ona $55.”

Entretantu, Diretór Gustavo orienta ba ekipa task force SAS atu tesi konsumidór ne’ebé dada bee hodi regra modo atu bee ne’e ba lai ema nia isin lolon, enkuantu Dili la’ós área agrikultura. “Tan ne’e ami-nia obrigasaun atu fó bee ba konsumu públiku no husu labele fura kanu bee arbiru.”

Nia aumenta katak ba konsumidór sira ne’ebé la asesu bee bele mai halo reklamasaun iha edifísiu DGAS  atu ekipa task force tun ba hadi’a. “Ami kontinua esforsu atu fó bee ba komunidade sira,” nia promete.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here