Reprezentante ADF-NZDF, Tenente Koronél Martin Dransfield no Diretór Sentru Treinamentu Operasaun Apoiu Dame F-FDTL, Kapitaun Xisto da Cruz no Vice Diretór WFP, Jean Patrick Teixeira klaran) hala'o konferénsia imprensa iha salaun enkontru ONU, Caicoli, Dili, sesta (02/08/2019) Imajen/Eugénio Pereira

DILI, 02 agostu 2019 (TATOLI)-Forsa Defeza Austrália no Forsa Defeza Nova Zelándia (Australian Defence Force/New Zealand Defence Force (ADF-‎NZDF) fó treinamentu ba membru FALINTIL-Forsa Defeza Timor-Leste (F-FDTL) atu prepara kondisaun hola parte iha misaun dame  Organizasaun Nasoins Unidas (ONU).

ADF-NZDF apresia Komandu F-FDTL estabelese ona Sentru Treinamentu Peace Keeping ONU iha Metinaro suporta hosi Assessor ADF-NZDF kada tinan fó apoiu treinamentu no tinan ida ne’e hahú iha loron 2 fulan agostu, ADF-NZDF kontinua fó treinamentu ba membru F-FDTL ne’ebé fasilita hosi United Nations World Food Programme (UN-WFP) hodi familiariza sira nia aan ho operasaun ONU no papél observadór militár iha nasaun seluk.

Reprezentante ADF-NZDF, Tenente Koronél Martin Dransfield hateten, ofisiál militár F-FDTL presiza tuir treinamentu, antes destaka ba iha misaun ONU.

Treinamentu ne’e hala’o iha kampaun ONU Caicoli, Dili, ohin, nu’udar introdusaun ida hodi haree servisu ONU nian no sei hala’o treinamentu durante semana tolu entre ONU ho F-FDTL no sei hala’o vizita no enkontru ho autoridade sira iha suku haat (4) iha Dili laran hanesan, Comoro, Madohi, Manleuana no Bebonuk hodi introdús ba povu oinsá forsa manutensaun dame hala’o nia knaar iha fatin risku ba konflitu hodi konsola povu atu moris iha dame.

Martin sente orgullu dezde tinan 2002 hola parte Forsa Nova Zelándia hodi hala’o misaun dame ONU iha Fronteira Munisípiu Covalima nia maka lidera no ohin loron kontinua fó treinamentu ba F-FDTL.

“Ha’u kontente xefia operasaun ba pás ONU nian iha Dili. Ami ho estudante kursu operasaun ba pás F-FDTL, Austrália no Nova Zelándia hodi fó kursu operasaun pás ba F-FDTL sira atu komprende molok sira hala’o misaun iha ONU,” dehan Tenente Koronél NZDF, Martin ba jornalista iha salaun enkontru ONU, Caicoli, Dili.

Tuir nia katak, bainhira membru F-FDTL sira tuir treinamentu sira bele iha ona esperiénsia no prepara ba hala’o misaun ONU iha kualkér nasaun ne’ebé ONU hala’o nia knaar atu lori dame.

“Forsa F-FDTL, Austrália, Nova Zelándia no ofisiál ONU sira tenke servisu ligasaun di’ak iha militár no observadór iha operasaun pás,” tenik nia.

Iha fatin hanesan, Diretór Sentru Treinamentu Operasaun Apoiu Dame F-FDTL, Kapitaun Xisto da Cruz,  orgullu, tanba tinan ne’e membru F-FDTL sira kontinua hetan treinamentu.

Treinamentu ne’ebé sira hetan, Kapitaun Xisto da Cruz, hateten, liga liubá oinsá material importante hakle’an koñesimentu nu’udar ofisiál ligasaun ONU no ofisiál ligasaun militár iha ONU no aprende mós lei internasionál umanitária no dame nian.

Tuir nian, treinamentu ne’e di’ak, tanba forsa sira aprende mós halo ligasaun ho organizasaun ONU nian, hanesan UN-WFP, UNICEF no organizasaun seluk tan.

“Ami hetan treinamentu ne’e liga liubá oinsá peritu ligasaun ONU nia misaun no observadór militár nia misaun oinsá iha ONU no liga ba lei internasionál sira,” Xisto esplika.

Kursu ne’e partisipa hosi ofisiál F-FDTL na’in sia (9), Australia na’in ida (2) no Nova Zelándia nian ida (1) no totál estudante hamutuk na’in 12.

Iha tinan kotuk, Komandu F-FDTL koopera ho ONU haruka ona observadór militár F-F-DTL na’in sia (9) hala’o misaun iha Sudaun do Sul no Lebanon.

Iha fatin hanesan, Vice Diretór Organizasaun Mundial ba Ai-han (WFP), Jean Patrick Teixeira, apresia fasilita membru forsa sira atu halo koordenasaun di’ak liután bainhira hala’o misaun ONU iha kualkér nasaun presiza kria koordenasaun di’ak.

Nia dehan, Timor-Leste nu’udar ezemplu di’ak ba nasaun ne’ebé uluk iha 1999 too mai 2000 ONU hala’o misaun dame iha TL too hetan susesu hodi hakat ba dezenvolvimentu.

Nia tenik, ohin loron, ONU fasilita fali forsa sira atu hala’o treinamentu para envolve iha misaun ONU iha rai li’ur.

Tuir planu WFP sei lori mós estudante sira ne’e ba hala’o  enkontru ho povu sira iha Suku tolu iha Dili hodi kria dame.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here