Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, 2 agostu 2019 (TATOLI)—Governu liuhosi Ministra Edukasaun Juventude no Desportu (MEJD), Dulce de Jesus Soares apresia ho Federasaun Shorinji Kempo Timor-Leste (FSKTL) ne’ebé realiza Kampionatu Nasionál hodi hasa’e juventude sira-nia talentu.

Ministra ne’e afirma, tempu agora joven barak moris iha konflitu nia laran, maibé FSKTL konsege tuur hamutuk hodi realiza eventu importante ida ne’ebé simples maibé bele motiva joven sira-nia talentu.

Lee mós:

Atleta Kempo 75 Tuir Kampionatu Nasionál

“Ita tenke enkoraja sira tanba iha inisiativa ida ne’ebé di’ak. Halibur joven sira hodi hamutuk halo eventu hanesan ne’e, joven sira sei la involve iha atividade hirak ne’ebé ladi’ak ba sira-nia án no ema seluk,” tenik Dulce ba jornalista hafoin partisipa iha abertura Kampionatu Nasionál FSKTL ne’ebé hala’o iha Jináziu Dili, ohin.

Nune’e, nia husu ba Federasaun hirak ne’ebé dadauk ne’e legál hela iha lista Governu nian bele hala’o mós atividade hanesan ne’e maski orsamentu ladún sufisiente.

Dulce hatutan, Governu apoiu nafatin atividade hotu federasaun ida-idak nian maski ho osan ne’ebé ki’ik maibé joven sira hotu bele sukat abilidade durante halo treinamentu durante tinan tomak.

“Ha’u husu ba atleta hotu bainhira sai atleta, tenke sai atleta ida ne’ebé disiplina. Disiplina ba nia án rasik. Disiplina iha nia hela fatin. Displina iha fatin ne’ebé nia hakna’ar-án ba hodi respeita ema seluk hanesan nia án rasik,” nia enkoraja.

Nia esplika, arte marsiál hanesan meiu ida hodi defende ema ida nia án rasik no bele mós sai atleta ne’ebé di’ak hodi reprezenta nasaun iha eventu sira internasionál.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here