Xefe Suku Comoro, Eurico da Costa de Jesus. Imajen/Osória A.Marques

DILI, 01 agostu 2019 (TATOLI)-Xefe Suku Komoro, Eurico da Costa de Jesus, orienta ona nia kolaboradór, xefe aldeia to’o komunidade Komoro atu ida-idak hamoos uma ninin no prevene konflitu iha suku laran.

Orientasaun ne’e Xefe Suku Eurico da Costa de Jesus hasai hodi husu nia komunidade atu kontribui ativa ba Dili moos no saudavel hodi komemora loron konsulta populár ba dala-20 (30 agostu 1999-30 agostu 2019).

“Ita tenke fó kontribuisaun ba ita nia nasaun doben Timor-Leste, tan ne’e ami hosi Suku Komoro koordena malu ho Xefe Aldeia no komunidade atu hamoos ida-idak nia uma oin no tenke hadook án hosi konflitu”, hateten Xefe Suku ba jornalista sira iha Sede Suku, ohin.

Autoridade lokál ne’e akresenta bazeia ba lei no orden, tenke hamoos ida-idak nia hela fatin no fa’an sasán fatin ne’ebé mak besik iha estrada públiku sira.

Nia dehan halo seguransa iha ida-idak nia hela fatin hodi kontribui ba estabilidade iha suku laran.

Iha semana rua ikus-ikus ne’e, komunidade Suku komesa halibur malu hodi hamoos fatin públiku sira, nune’e mós apaga lia-fuan sira ne’ebé la edukativu ne’ebé riska iha moru lolon sira.

Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here