Komandante Polícia Nacional Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Arnaldo de Araújo

OÉ-CUSSE, 1 agostu 2019 (TATOLI)—Komandante Polícia Nacional Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Arnaldo de Araújo deklara katak dezde uluk to’o agora, Oé-Cusse laiha problema tanba povu Atoni edukadu.

Arnaldo hato’o deklarasaun ne’e hodi responde pergunta TATOLI kona-ba oinsá situasaun atuál hafoin eis Prezidente Autoridade RAEOA husik hela Oé-Cusse iha kuarta (31/7).

“Hafoin eis Prezidente Autoridade RAEOA, Marí Alkatiri husik hela Oé-Cusse, situasaun la’o hakmatek no kontroladu. Ha’u hateten katak povu Atoni ne’e povu ida ne’ebé di’ak, edukadu no iha kompriensaun aas,” deklara Arnaldo, iha Aeroportu Internasionál Rota do Sândalo Oé-Cusse, (1/8).

Nia informa mós katak maski durante ne’e seidauk akontese problema ruma, maibé parte PNTL sempre hala’o nia kna’ar hodi halo vizilánsia durante oras 24.

Iha kalan, membru PNTL ne’ebé hetan apoiu hosi Komponente Navál FALINTIL-Forsa Defeza Timor-Leste (F-FDTL), sempre hala’o kontrolu ba edifísiu estadu importante sira hanesan Gabinete Autoridade, Aeroportu, Prezidente Autoridade nia rezidénsia, Sentru Elétrika no seluk-tan.

Patrullamentu ne’e, hala’o bazeia ba diretiva hosi Komandu Jerál no mós komandu F-FDTL, hodi garante povu nia moris hakmatek.

Ekipa patrollamentu ne’e sempre halo chek point (pasa revista) ba movimentu ema, karreta no motór iha tempu loron no kalan, maibé to’o oras ne’e seidauk hetan ema ruma ne’ebé kontra regra tránzitu inklui arma branka.

Kona-ba preparasaun ba komemorasaun Tinan 20 Konsulta Populár, komandante ne’e hateten PNTL preparadu atu asegura no garante katak serimónia sei la’o ho hakmatek no susesu tuir ema hotu hakarak.

Komandante ne’e apela ba Oé-Cusse oan sira liliu juventude atu kontinua mantein seguransa tanba komemorasuan Loron Konsulta Populár mós besik ona, kontinua respeita malu, laiha grupu ida atu impede ba malu, tanba Oé-Cusse dezde uluk to’o agora seidauk akontese problema.

Arnaldo lakohi temi kuantidade membru PNTL iha Oé-Cusse maibé nia dehan de’it katak oras ne’e membru sufisiente atu asegura loron boot ne’ebé sei mai.

Oras ne’e, membru PNTL iha Oé-Cusse, kompostu hosi Batalhão Órdem Pública (BOP), UPF, Polísia Rezerva no Komponente Navál F-FDTL.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here