DILI, 01 agostu 2019 (TATOLI)–Polítika troka malu kargu, hanesan akontese ba Prezidente Rejiaun Administrativu Espesiál Oe-Cusse Ambeno (RAEOA) no Zona Ekonomia Espesiál Sosiál Merkadu (ZEEMS), Mari Alkatiri, ida ne’e normál maibé tenke garante sustentabilidade RAEOA-ZEEMS tanba hanesan mega projetu presiza iha retornu iha futuru.

“Polítika sira sempre preokupa maka troka pozisaun ba mai, hanesan pozisaun iha RAEOA, hasai ida ne’e, troka ida ne’ebá maibé ami preokupa maka sustentabilidade RAEOA”, Diretór Ezekutivu Forum Organizasaun Naun Governamentál Timor-Leste (FONGTIL), Daniel dos Santos Carmo, dehan ba jornalista sira iha nia kna’ar fatin, Kaikoli, ohin.

“Kuandu ita la halo didi’ak maibé ita hanoin troka pozisaun, maka projetu ne’e sei abandona no ita sei estraga osan de’it iha RAEOA”, Daniel salienta.

Tanba ne’e, Daniel husu ba Governu atu bá oin halo polítika ne’ebé di’ak atu nune’e bele garante mega projetu ZEEMS hodi fó retornu atu garantia sustentabilidade.

“Ami agora preokupa maka oinsá Governu kria polítika di’ak hodi garante sustentabilidade ZEESM no fó retornu ba Estadu”, katak.

Daniel sujere ba Governu atu hili ema ne’ebé iha kapasidade jestaun ne’ebé di’ak hodi haree RAEOA-ZEEMS, nune’e bele iha kontinuidade dezenvolvimentu.

“Lider sé de’it maka jere RAEOA tenke iha koñesimentu kona-ba jestaun oinsá atu jere, nune’e labele influensia situasaun, tenke tane profisionalizmu, se lae ita ignora buat hotu hodi haree ba polítika de’it maibé ita la haree buat importante”, nia dehan.

Jornalista : Natalino Costa

Editora     : Maria Auxiliadora

HAKEREK NO HATÁN

Please enter your comment!
Please enter your name here