Ministru Estadu Koordenadór Asuntu Ekonómiku (MEKAE) no Ministru Turizmu Komérsiu no Indústria (MTCI-sigla portugés) interinu, Fidelis Manuel Leite Magalhães. Imajen Jogerjo Guterres.

DILI, 01 agostu 2019 (TATOLI) – Primeiru-Ministru (PM), Taur Matan Ruak, delega kompeténsia ba Ministru Reforma Lejizlativa no Asuntu Parlamentár (MRLAP), Fidélis Manuel Leite Magalhães, hodi asume tan kargu Ministru Estadu Koordenadór Asuntu Ekonómiku (MEKAE) ho Ministru Turizmu Komérsiu no Indústria (MTCI-sigla portugés) interinu, hodi troka Ministru Estadu Prezidénsia Konsellu Ministru, Agio Pereira.

Delegasaun podér ne’e bazeia ba despaixu númeru 028/PM/VII/2019 ba kargu MEKAE no númeru despaixu 027/PM/VII/2019 ba kargu MTCI.

Ministru Fidelis esplika razaun Xefe Governu deside hodi troka MEKAE no MTCI tanba atuál Ministru Estadu Prezidénsia Konsellu Ministru, Agio Pereira nia servisu barak.

“Ha’u asume knaar ba asuntu ekonómiku no turizmu komérsiu no indústria ne’e iha semana rua liubá, objetivu nomeia fali ha’u tanba Ministru Agio Pereira okupadu tebes no atividade barak tenke halo, tanba ne’e nomeia ha’u atu ajuda”, afirma nia ba TATOLI iha salaun enkontru Timor-Plaza, ohin.

Maibé antes ne’e nia hatutan: “Ha’u sempre ajuda ministru Agio hodi tau-matan ba funsaun hirak ne’ebé maka ho auzénsia ministru nian, ami na’in rua sempre iha koordenasaun ne’ebé perfeitu”.

Ministru Fidélis lori tan pasta MTCI no MEKAE inklui instituisaun Estadu sira ne’ebé tutela, hanesan Sentru Nasionál Formasaun Profisionál no Empregu-Tibar, Sentru Nasionál Formasaun Profisionál-Bekora, Institutu Nasionál Dezenvolvimentu Mão de Obra, Inspesaun Jerál Traballu.

Autoridade Inspesaun no Fiskalizasaun ba Atividade Ekonómiku Sanitária no Alimentár, Institutu Públiku (AIFAESA,IP), Banku Nasionál Komérsiu Timor-Leste (BNCTL-sigla portugés), Servisu Rejistrasaun no Verifikasaun Emprezariál, Institutu Públiku (SERVE,IP), Institutu Apoiu Dezenvolvimentu Emprezariál (IADE), Trade Invest inklui Ajénsia Promosaun Investimentu no Esportasaun.

Jornalista : Antónia Gusmão

Editora     : Maria Auxiliadora

HAKEREK NO HATÁN

Please enter your comment!
Please enter your name here