Xefe Departamentu Komunikasaun Sosiál Universidade Nacional Timor Lorosa'e (UNTL), Marcelino Ximenes Magno

DILI, 31 jullu 2019 (TATOLI)-Xefe Departamentu Komunikasaun Sosiál Universidade Nasionál Timor Lorosa’e (UNTL), Marcelino Ximenes Magno, hateten maske ezisténsia ajénsia TATOLI foin mak tinan tolu maibé iha ona vontade (kompromisu) forte.

“Ha’u haree imi iha kualidade, imi iha talentu, imi iha kompromisu ne’ebé forte ba prosesu dezenvolvimentu mídia iha nasaun ida ne’e. Ha’u nia konfiansa boot ba imi hotu hanesan institutu públiku, ha’u mós fiar katak nasaun ne’e sei orgullu ho ajénsia TATOLI iha futuru,” nia tenik hafoin partisipa iha aniversáriu datoluk ajénsia TATOLI iha Suai Room, Timor Plaza, kuarta ne’e.

Nune’e nia fiar, ba oin TATOLI sei fó informasaun ofisiál Estadu nian ba públiku ho kredível, tanba ne’e nia apresia.

“Ha’u apresia tebes ho servisu ne’ebé jornalista TATOLI halo durante ne’e, maske sei falta buat barak maibé sei bele hadi’a no sei labele hadi’a iha tempu badak atu sai perfeitu kedas, liliu iha língua,” nia dehan.

Tuir nia, ho jornalista ne’ebé ho maioria joven iha TATOLI, sei bele lori institutu públiku ne’e sai naroman liu.

Nia mós konsidera ema ne’ebé servisu kle’ur hanesan jornalista, hetan ona esperiénsia kona-ba saida de’it mak akontese iha nasaun ida tantu polítika, ekonomia no progresu dezenvolvimentu.

Magno akresenta, públiku sei tau konfiansa bainhira TATOLI prodúz informasaun ne’ebé ho kualidade no balansu tuir kódigu étika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here