Ministru Estadu Koordenadór Asuntu Ekonómiku (MEKAE) no Ministru Turizmu Komérsiu no Indústria (MTCI-sigla portugés) interinu, Fidelis Manuel Leite Magalhães. Imajen Jogerjo Guterres.

DILI, 01 Aug 2019 (TATOLI)-Ministru Estadu Koordenadór Asuntu Ekonómiku (MEKAE) interinu no atuál Ministru Reforma Lejizlativa no Asuntu Parlamentár, Fidélis Manuel Leite Magalhães, prezide soru-mutu kafé dadeer hamutuk ho Ajénsia Nasionál ne’ebé hamahan-an iha MEKAE no mós ho ajénsia internasionál sira.

“Ami konversa nakloke. Durante ne’e ha’u rona katak ministériu sira hotu rejista dezafiu, maibé laiha komunikasaun hamutuk, tanba ne’e maka realiza kafé dadeer ne’e hothotu bele ko’alia ba malu kona-ba dezafiu ne’ebé iha no oinsá solusiona. Objetivu prinsipál maka atu buka solusaun”, Ministru Fidélis Magalhães afirma hafoin enkontru iha Timor-plaza, ohin.

Iha soru-mutu dahuluk ne’e ajénsia internasionál sira hato’o pontu importante sira maka tenke sinerjia ba polítika hanesan polítika promove setór privadu, nune’e tenke esforsu aan ba iha setór ne’e.

“Agora, ita hatene katak impaktu negativu ne’ebé tenke antesipa hosi polítika Governu nian entaun sira husu ita bele halo avaliasaun didi’ak ba kada polítika ne’ebé Governu halo tanba buat ida polítika ne’e, iha liman sorin ita iha intensaun ida, liman karuk iha intensaun ida, liman loos la aliña ho liman karuk maka polítika sira ne’e ha’u bele dehan soke malu, entaun nia rezultadu laiha tanba buat ida ne’ebé maka importante iha ekonomia maka hatene didi’ak sinál ekonómiku sira”, Fidélis afirma.

Tanba ne’e maka liuhosi kafé dadeer ne’e identifika katak hosi ajénsia internasionál hakarak diversifika ekonomia presiza fó apoiu ne’ebé másimu ba setór privadu no avansa ho diversifikasaun ekonómika, maibé tenke halo balansu katak tempu ba setór públiku atu intervein no mós loke espasu ba setór privadu bele boot rasik.

“Ha’u hanesan ministru asuntu ekonómiku interinu tenke iha vizaun ho sentidu haree setór sira. Prioridade Governu iha ne’ebé, programa iha ne’ebé, intervensaun Governu iha ne’ebé no analiza Governu kada intervensaun ne’ebé halo, depois aliñamentu para sira bele kontribui ba diversifikasaun ekonómika, mós kontribui ba dezenvolvimentu setór privadu”, katak.

Ministru Fidélis dehan, orientasaun bá oin maka haree liu ba kapasidade, lori rezultadu konkretu katak dezafiu no problema ne’ebé ajénsia sira hasoru tenke solusiona lalais no labele husik kleur.

Partisipa iha kafé dadeer ne’e mai hosi Autoridade Inspesaun no Fiskalizasaun ba Atividade Ekonómika, Sanitária no Alimentár, (AIFAESA, IP), Banku Nasionál Komérsiu Timor-Leste (BNCTL, sigla portugés), Servisu Rejistrasaun no Verifikasaun Emprezariál (SERVE, I.P), TradeInvest, no seluk tan. Husi ajénsia dezenvolvimentu mak Banku Dezenvolvimentu Aziátiku (ADB), Banku Mundiál, Programa Nasaun Unida ba Dezenvolvimentu (UNDP), no International Labour Organization.

Jornalista :  Antónia Gusmão

Editora : Maria Auxiliadora        

HAKEREK NO HATÁN

Please enter your comment!
Please enter your name here