Bandeira RDTL.Imajen/Antonio Goncalves

DILI, 01 agostu 2019 (TATOLI)-Atu komemora festa popular no istóriku, loron konsulta popular ba dala-20 (30 agostu 1999-30 agostu 2019) no prezensa forsa INTERFET nian iha Timor-Leste (20 Setembru 1999), Xefe Suku Comoro kolabora ho Xefe Aldeia sira hodi  husu komunidade Suku Comoro atu hasae bandeira RDTL iha sira ida-idak nia uma oin.

Xefe Suku Comoro, Eurico da Costa de Jesus. Imajen/Osória A.Marques

Xefe Suku Comoro, Eurico da Costa de Jesus, kontinua apela ba komunidade sira ne’ebé seidauk hasae bandeira nasionál atu hasa’e hodi kontribui ba festa auto determinasaun povu Timor-Leste nian ne’e.

“Tuir ha’u nia haree ba komunidade sira iha hau nia área komesa dada ona bandeira depois de ami apela ba sira, maibé ba sira ne’ebé mak seidauk dada, ami kontinua husu para sira  hasa’e bandeira RDTL iha uma oin,” hateten Xefe Suku Comoro, Eurico da Costa de Jesus, ba jornalista sira, ohin, iha Sede Suku Comoro, Dili.

Xefe Suku Eurico dehan, juventude Comoro kada aldeia mós iha inisiativa rasik hodi dada bandeira RDTL iha ida-idak nia uma oin. Nune’e, bainhira hale’u Suku Comoro maioria komunidade no negosiante sira hasae ona bandeira RDTL iha sira nia uma oin no sira nia loja ka kiós oin.

Jornalista : Osória A. Marques  

Editór       : Francisco Simões

HAKEREK NO HATÁN

Please enter your comment!
Please enter your name here