Foto Espesial

DILI, 1 agostu 2019 (TATOLI) – Segundu Vise Prezidente Parlamentu Nasionál, Luís Roberto, hateten líder istóriku hanesan kay Rala Xanana Gusmão no Marí Alkatiri, bainhira rona malu buat hotu sei la’o ho di’ak.

“Durante ne’e ha’u haree sira hamutuk hela maibé tanba diferensa ideia iha polítika ne’e mak halo ida-idak defende sira-nia partidu. Kuandu maun Xanana ho maun Marí rona malu, ha’u fiar buat hotu-hotu la’o di’ak”, nia dehan iha Parlamentu Nasionál (PN), kinta ne’e.

Nia akresenta, hanesan mós líder istóriku sira seluk hanesan atuál Prezidente Repúblika, Francisco Guterres Lú Olo no Primeiru-Ministru, Taur Matan Ruak, presiza kria koordenasaun polítika ne’ebé di’ak hodi fó solusaun ba inserteza polítika ne’e.

Maski nune’e, nia fiar líder istóriku sira fuan ida ba rai ida ne’e hodi hadi’a dezenvolvimentu nasaun nian ba oin.

“Se menus diálogu no lakohi tuur hamutuk, ida-idak arrogante ho nia hanoin de’it, ita jerasaun foun hateke hosi kotuk no povu mak sai vítima ba impase polítika ne’e”, nia tenik.

Nune’e, Deputadu Bankada KHUNTO ne’e husu ba Primeiru-Ministru ho Prezidente Repúblika, Francisco Guterres Lú Olo, tenke buka meiu hodi rezolve kandidatu membru governu ne’ebé to’o agora seidauk hetan pose.

“Tuir ha’u-nia observasaun hosi problema sira hotu mak kestaun polítika, balun dehan iha justisa, maibé to’o agora seidauk iha justifikasaun ida ne’ebé loos katak sira komete iha kazu ruma”, katak Luís Roberto.

Nia subliña, solusaun atu hakotu impase polítika iha rai laran mak líder partidu boot sira hanesan Xanana Gusmão, Mari Alkatiri no Taur Matan Ruak tuur hamutuk, rona malu no fó hanoin ba malu, tanba nasaun ne’e labele moris beibeik iha inserteza polítika.

“Koa’lia ba malu para bele hakotu tiha impase polítika ne’e. Se lae, ida ne’e mak sai fali obstákulu boot ba dezenvolvimentu Timor-Leste nian”, nia fó hanoin.

Tuir nia, estrutura governu tenke kompleta ona, nune’e hala’o ezekusaun orsamentu ho másimu no la kle’ur tan tama diskusaun orsamentu jerál Estadu (OJE) 2020.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here