DILI, 16 jullu 2019 (TATOLI)-Médiku timoroan na´in haat hanesan doutór Rui Maria de Araújo-eis-primeiru-ministru, doutór Avelino Guterres Correia, doutór Domingos da Silva no doutór João Martins komemora tinan 25 “bodas de prata” ho semináriu “Tinan 25 iha Kareira Médika: Serbi Ema Moras, Povu No Nasaun” iha salaun CNE (Sentru Nasionál Eleisaun-sigla portugés), Colmera, tersa (16/07/2019)
“Médiku na´in 4 ne’ebé hala´o ona kna’ar medika durante tinan 25, maibé ohin hatudu ezemplu no iha kontinuadade ba oin, atu motiva ita-nia médiku, profisionál saúde sira, bele kria nafatin comitment (kompromísiu) oinsá atu bele serbi ita-nia nasaun, serbi ita-nia komunidade no povu iha rai ida ne’e ho di´ak,” hateten Ministru Interinu no Vise-ministru Saúde Asuntu Dezenvolvimentu Estratéjiku Saúde, Bonifácio Maukoli Dos Reis, hafoin partisipa semináriu komemorasaun tinan 25 iha kareira medika husi médiku timoroan na´in haat.
Tuir Vise-ministru Bonifácio Maucoli katak semináriu ne´e atu espresa fali médiku na´in haat ne´e nia tempu uluk hahú no ramata estudu iha área médiku nian. “Iha kontinuidade ita hotu hatene rasik katak médiku sira ne’e asumi tiha kargu mediku maibé sira la´ós serbi de´it pasiente no la´ós serbi de´it área sira seluk”.
Médiku timoroan na´in haat ne´e uluk mós hala´o estudu médiku nian iha Universitas Udayana Bali, Fakultas Kedokteran.
Governante ne´e reforsa mós katak ho buat ne´ebé médiku sira ne´e hatudu sai mós ezemplu ba médiku sira tuir mai. “Sira hanesan anin ida oinsa atu banati tuir médiku na´in 4 nia ain fatin,” kompara Vise-ministru Bonifácio Maucoli.
Semináriu “Bodas de Prata” ne´e partisipa mós husi Eis-ministru Saúder, doutór Nelson Martins, xefe postu saúde sira inklui interesadu sira.
Jornalista : Felicidade Ximenes
Editór : Rafy Belo
