iklan

NASIONÁL

"Moras Ba Ospitál, Labele Hola Aimoruk Herbal"

"Moras Ba Ospitál, Labele Hola Aimoruk Herbal"

Ai-moruk herbal. Foto/Google.

DILI, 19 jullu 2019 (TATOLI)—Governu Timor-Leste liuhusi Minstériu Saúde liliu Departamentu no Planifikasaun Jestaun Akizasoens, Diresaun Nasionál Farmásia, sei hato’o informasaun ba komunidade sira katak bainhira hetan moras tenke ba iha ospitál ka klínika hodi bele hatene sira-nia moras, labele hola no konsumu aimoruk herbal.

“Ami sei hato’o informasaun ba komunidade sira katak bainhira hetan moras tenke ba iha ospital ka klínika, hodi bele hatene sira-nia moras. Labele hola aimoruk herbal ka liuhusi online. Tanba aimoruk online laiha lisensa ruma husi ami entaun labele konsumu,”  dehan Diretora Nasionál Farmásia no Medikamentu ein ezersísiu, Rita de Araujo Ataide do Rego, ba Ajénsia TATOLI liuhusi entrevista iha nia kaar fatin, Kaikoli, Dili, sesta (19/7/2019).

Tanba ne´e, nia hatutan, Governu liuhusi Diresaun Nasionál Farmasia iha ona planu atu sirkula no regula aimoruk tradisionál no aimoruk herbal sira ne’ebé oras ne’e daudaun fa´an lemo-lemo iha Timor-Leste laran tomak.

Nia dehan, Governu hato’o ona informasaun ba ema sira ne’ebé fa´an aimoruk herbal katak bainhira sira hakarak atu investe ka fa´an aimoruk tradisionál ho aimoruk herbal, tenke liuhusi Governu liliu Diresaun Nasionál Farmásia hafoin governu fó autorizasaun. Se sira la rejistu signifika katak sira ilegál no aimoruk herbal sira ne’ebé sira fa´an ne’e mós ilegál.

Nia infroma, agora daudaun iha ona kampañia balun mai ona rejistu mak Komapañia Jomardi, LDA no Kompañia B. A. Gomi, LDA. Kompañia rua refere mak iha ona lisensa no iha direitu sai importadór ba aimoruk herbal tanba sira hetan ona autorizasaun husi Governu liliu Diresaun Nasionál Farmasia.

Ba kompaña hirak seluk foin atu loke, nia haktuir, Governu sei hato’o informasaun kona-ba kritéria sira no oinsá mak atu rejistu, para sira bele distribui ka fa´an aimoruk herbal ho legál.

Entretantu, nia informa, Xineza no ema Indonézia sira ne’ebé mak daudaun ne’e loke klínika privadu no farmásia iha Dili laran, sira-nia kompañia hetan ona lisensamentu husi Governu liuhusi Ministériu Saúde liliu Diresaun Nasionál Farmásia. Maibé, tuir nia, kompañia sira ne’ebé fa´an aimoruk herbal ka liu husi online, sira hirak ne’e seidauk rejistu.

Notísia relevante: http://www.tatoli.tl/2019/07/aimoruk-herbal-barak-seidauk-rejistu-iha-ministeriu-saude/

Jornalista: Felicidade Ximenes

Editór      : Rafy Belo

iklan
iklan

Leave a Reply

iklan
error: Content is protected !!