DILI, 10 jullu 2019 (TATOLI)-Komandu Polisia Nasionál Timor-Leste (PNTL) sei fasilita formasaun kona-ba prevensaun krime iha komunidade nia leet ba lider Konsellu Polisiamentu Komunitáriu (KPK).
Komandante Jerál PNTL, Komisáriu Faustino da Costa informa kestaun ne’e hodi responde kona-ba kazu iha Suku Manleuana, Aldeia Ramelau, ne’ebé deskonfia membru KPK sira baku joven ida ho naran Lucio do Santos too grave no hetan kanek pontu haat iha nia parte ulun, foin lalais ne’e.
“Asuntu ida ne’e ami hetan ona informasaun ho relatóriu sira ne’e, ami orienta atu haree prosesu sira ne’e. Agora ami sei kontinua fó formasaun ba membru KPK sira,” hateten Komisáriu Faustino da Costa, ohin, hodi responde jornalista sira iha Kuartél Jerál PNTL, Caicoli, Dili.
Nia dehan, membru KPK nu’udar ema sivíl sira mós iha kompeténsia atu halo prevensaun ba krime sira ne’ebé mosu iha komunidade nia leet, maibé bainhira baku ema presiza hatene razaun klaru hodi labele hamosu konflitu iha implementasaun serbisu KPK nian.
“KPK nia misaun atu halo prevensaun ba krime. Sidadaun se mak halo krime, KPK sira tenta prevene. Se karik mosu dezentendimentu iha terrenu bele mosu konfrontu ita sei buka rezolve,” tenik Komisáriu Faustino da Costa.
Tuir Norma Operasionál Prosedura (NOP) knaar KPK iha kada suku atu halo identifikasaun no mediasaun ba problema ne’ebé akontese no informa kauza husi problema sira ne’e ba PNTL atu bele rezolve ho dame.
Jornalista : Eugénio Pereira
Editór : Francisco Simões