DILI, 17 jullu 2019 (TATOLI)-Dezastre naturaís ne’ebé akontese iha territóriu Timor Leste iha janeiru to’o maiu, tinan ne’e, rezulta ema na’in haat (4) mak mate no sobu uma hamutuk 106.
Xefe Departamentu Emerjénsia, Diresaun Jestaun Dezastre, Ermelinda Pires, dehan, maske prosesu verifikasaun ba vítima dezastre naturaís remata ona, maibé diresaun sei kontinua verifika liután relatóriu ne’e hodi hetan loloos númeru hira maka tama iha kategoria estragus total, natoon no kmaan.
“Diresaun jestaun dezastre halo ona verifikasaun dadus hodi nune’e bele hatene, tipu estragu ida oinsá atu bele apoiu mós,” informa Xefe Departamentu Emerjénsia Diresaun Jestaun Dezastre, Ermelinda Pires, ohin, ba Ajénsia TATOLI iha Bemori, Dili.
Nia akresenta ba apoiu emerjénsia hotu ona, maibé, distribuisaun materiál konstrusaun sei hein relatóriu verifikasaun molok halo distribuisaun ba vítima dezastre ne’ebé akontese iha Munisípiu Aileu, Baucau, Lautem, Manufahi, Manatuto ho Viqueque.
Ba daudaun ne’e, Diresaun Jestaun Dezastre hala’o hela distribuisaun materiál konstrusaun hanesan besi, simente, kalén, ai no seluk tan ba vítima dezastre naturaís ne’ebé akontese iha 2017.
“Ba materiál konstrusaun ita seida’uk aloka hotu, maibé iha semana kotuk hahú ona ba Munisípiu Aileu, Postu Administrativu Laulara ho Lekidoe no ohin mós kontinua distribui iha Aileu Vila ho Remexio,” Ermelinda Pires informa.
Nia subliña katak, vítima dezastre 2017 foin maka hetan apoiu tanba impase polítika afeta ba orsamentu estadu.
Jornalista : Nelson de Sousa
Editór : Francisco Simões