Prezidente Repúblika, Francisco Guterres Lú Olo. Imajen Mídia PR

DILI, 31 jullu 2019 (TATOLI)—Prezidente Repúblika (PR), Francisco Guterres Lú Olo orgullu tanba Timor-Leste (TL) bele iha ajénsia notisioza rasik ida ho  naran ANTIL, iha jullu 2016 no ikus mai muda naran ba TATOLI.

Maski otas sei nurak, tuir Xefe Estadu, TATOLI hatudu dadaun ona esforsu atu habelar informasaun ba públiku, iha lian ofisiál rua, Tétun no Portugés.

Ho  serbisu informativu ida ne’e, PR Lú Olo, hateten Tatoli ajuda órgaun komunikasaun sira seluk haklaken informasaun nune’e enkoraja povu atu partisipa iha prosesu foti desizaun no dezenvolvimentu nasionál.

“Ha’u fiar katak maluk  jornalista sira,  ne’ebé serbisu iha TATOLI,  hatene saida mak étika profisionál no sei hadi’a-án ba beibeik iha aspetu tékniku no koñesimentu,  atu  hato’o beibeik  informasaun loos no kle’an, ho kualidade aas, hodi hetan fiar ba beibeik hosi ita-nia povu no komunidade internasionál,” nia informa.

Liuhusi mensájen ida ne’e, Xefe Estadu hato’o parabéns ba  TATOLI, ne’ebé selebra aniversáriu ba dala tolu, nu’udar Ajénsia Notisioza Estadu Timor-Leste nian.

“Ideia atu Timor-Leste iha  rasik Ajénsia Notisioza ida  mai kedas hosi tinan 1975 no mosu iha tempu ne’ebá ho naran East Timor News Agency (ETNA). Jornalista australianu Roger East mai iha ne’e atu ajuda ita harii Ajénsia ne’e,  maibé nia rasik hetan mate iha dezembru 1975,” Lú Olo haktuir.

“Tanba kondisaun funu, ita la konsege harii Ajénsia iha rai-laran maibé ita konsege fó-sai informasaun kona-ba luta libertasaun nasionál liuhusi Rádio Maubere ba belun australianu Denis Freney,  iha Sydney, no nia mak hato’o notísia ba Frente Esterna no komunidade internasionál. Hafoin lakon Rádio Maubere, ita hetan fali dalan seluk hodi hato’o notísia ba rai-li’ur,” nia salienta.

Hanesan mós nasaun sira seluk, Prezidente Repúblika dehan, importante tebe-tebes ba Timor-Leste iha kanál ofisiál ida, ne’ebé hato’o informasaun Estadu nian ba Povu tomak no ba Komunidade Internasionál.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here