Sekretáriu Estadu Komunikasaun Sosiál, Merício Juvenal dos Reis 'Akara'. Imajen Tatoli/ Egas Cristóvão

DILI, 31 jullu 2019 (TATOLI)—Sekretáriu Estadu Komunikasaun Sosiál, Merício Juvenal dos Reis Akara, hateten iha tinan tinan oin, 2020,  Sekretária Estadu Komunikasaun Sosiál (SECOMS-sigla portugés)  komprometidu atu kontinua fó apoiu no reforsa TATOLI hodi funsiona nu’udar Institutu Públiku ne’ebé autónomu iha termu sira hanesan finanseiru, administrativu no mós patrimóniu.

Planu SECOMS nia ba longu prazu, nia esplika, maka bainhira mandatu governu ne’e ramata, sei prepara kondisaun própriu hanesan harii edifísiu ba TATOLI hodi funsiona nu’udar Institutu Públiku ida ne’ebé dignu no fornese espasu serbisu ida ne’ebé seguru ba funsionáriu tomak, nune’e TATOLI bele presta serbisu di’ak liu-tan.

“Espetativa Governu nia maka ho transformasaun ida ne’e, TATOLI bele sai ajénsia notisioza ne’ebé exelente, kualidade altu, fonte informasaun ida ne’ebé kredível liu ho nia espansaun kobertura hahú hosi área rurál to’o internasionál,” dehan Merício liuhusi ninia deskursu bainhira partisipa iha seremónia aniversáriu Agência Tatoli ba datoluk (27 jullu 2016-27 jullu 2019) no lansamentu Embriaun Agência Tatoli ba Institutu Públiku.

Nia apela ba TATOLI, atu fó atensaun hodi presta serbisu di’ak perante povu no estadu ne’ebé nu’udar na’in ba ajénsia notisioza ida ne’e, husu ba TATOLI atu sai promotór ba konseitu no prátika DEVELOPMENT JOURNALISM KA JURNALISMU DEZENVOLVIMENTU no PEACE JOURNALISM ka JURNALISMU DAM, hodi tulun aselerasaun no hasae kualidade dezenvolvimentu iha nasaun ne’e no tulun kriasaun dame no estabilidade nasionál ne’ebé presiza tebes ba dezenvolvimentu.

Husu mós ba TATOLI atu haforte nia-án ba bebeik nu’udar Estadu nia Ajénsia diplomata  (DUTA NEGARA) ida ba kampaña no promosaun Timor-Leste ba mundu, hodi bele dada investór rai-li’ur atu mai kuda investimentu iha nasaun ne’e no hodi bele halibur suporta internasionál, rejionál no apoiu seluk tan hosi rai-li’ur ba Timor-Leste nia dezenvolvimentu.

Aproveita mós momentu ida ne’e, atu husu ba kolega membru governu sira, Parlamentu, no mós instituisaun estadu sira seluk atu utiliza espasu iha TATOLI, fó oportunidade atu TATOLI bele asesu informasaun sira hodi divulga no tranzmite ba sidadaun sira nune’e mós ba internasionál.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here