Sekretáriu Estadu Juventude no Desportu, Nélio Isaac Sarmento. Imajen/Egas Cristovão.

DILI, 31 jullu 2019 (TATOLI)-Sekretáriu Estadu Juventude no Desportu, hatete Tatoli tenke sai pilár informasaun ne’ebé kredivel atu nune’e bele hamenus informasaun sira ne’ebé laiha serteza kona-ba ita-nia Estadu no pluralizmu opiniaun iha ita-nia sosiedade hodi haburas demokrasia.

“Primeiru, ha’u atu dehan Tatoli harii tanba iha objetivu ida katak Tatoli mosu iha momentu ida ne’ebé ita hotu preokupa kona-ba kualidae informasaun, direitu ba informasaun, no oinsá tenke [atu] sai pilár informasaun ne’ebé kredivel. Atu nune’e, Tatoli bele hamenus informasaun sira ne’ebé laiha serteza kona-ba ita-nia Estadu no pluralizmu  opiniaun iha ita-nia sosiedade hodi haburas demokrasia,” dehan Sekretáriu Estadu Juventude no Desportu, Nélio Isaac Sarmento, ba Ajénsia Tatoli liuhusi entrevista via rede sosiál, ohin.

Eis Sekretáriu Estadu Komunikasaun Sosiál ne’e mós hatutan, nu’udar Ajénsia Noitisioza Timor-Leste, Tatoli tenke prontu ho rekursu ne’ebé kualifikadu hodi responde kompeténsia jornalizmu ne’ebé lei ko’alia. Katak, jornalista sira ne’ebé haknaar iha Tatoli, jornalista ne’ebé kualidade hodi hatutan informasaun bazeia ba faktus, kredivel no fiar duni.

Tatoli nu’udar ajénsia Estadu ne’ebé ninia natureza multimédia, nia esplika, mak la’ós de’it Tatoli atubele fó solusaun hodi ajuda mídia emprime sira seluk inklui rádiu ho tv iha sira-nia konteudu produsaun.

Aleinde ne’e, nia hakle’an liután, Tatoli harii atu serve mós informasaun ba timoroan sira iha diaspora no fó sai protensialidade Timor-Leste ba mundu.

Tatoli ne’e, ajénsia Estadu eziste ona iha Timor-Leste no halo aniversáriu ba datoluk entaun Tatoli tenke hatete “lae” ba informasaun falsu sira ne’ebé namlekar iha rede sosiál sira.

“Ikus liu, ha’u atu dehan, tinan tolu (3) ona Tatoli harii espera bele sai mídia ne’ebé solusiona lia boatu alias Hoax  ne’ebé oras ne’e buras iha rai-laran no mundu. Tatoli labele sai fali pilár atu promove notísia Hoax. Ita la’o ho buat kiik ho rekursu ita-nian rasik, no fiar sei hetan orgullu iha tempu ikus. Só rezultadu de’it mak sei lori Tatoli tama iha ema nia fuan,” Nelio hateten.  Parabéns Tatoli.

Tatoli lori ona Timór ba mundu, nia hatán, iha ona vontade maibé seidauk máximu no presiza investimentu barak liután. Tanba harii mídia online ho konteudu multimédia, la fasil. “Ha’u laran metin ba estrutura no ezekutivu sira iha Tatoli tenke badinas no serbisu barak liutan to’o loron ida rezultadu  mak sei justifika,” nia dehan.

Tanba ne’e, Eis Sekretáriu Estadu Komunikasaun Sosiál ne’e, enkoraja jornalista sira ne’ebé haknaar-aan iha Tatoli atu hala’o serbisu ho profisioál, ho responsabilidade ne’ebé aas nu’udar timoroan.

“Ha’u tatoli ba jornalista Tatoli sira tenke aprende barak, lee barak. Lebele lori ‘ego’ hakerek  notísia maibé verifika informasaun ho dadus. Bele Kritíka  maibé tenke sai kritiku  atu nune’e bijaksana iha hakerek no ekilibriu iha publikasaun. Mundu presiza mídia online ne’ebé adekuadu, lalais no hatudu produtu  ne’ebe aliña ho mundu ohin loron iha avansu teknólojia,” Nélio tatoli.

Jornalista: Cancio Ximenes

Editór: Rafy Belo

HAKEREK NO HATÁN

Please enter your comment!
Please enter your name here