Padre Martinho G. da Silva Gusmão.

DILI, 31 jullu 2019 (TATOLI)—Dosente Filozofia Institutu Superior ba Filozofia no Teolojia (ISFIT-sigla portugés), Dom Jaime Garcia Goulart,  Padre Martinho G. da Silva Gusmão, ohin, afirma katak, iha aniversáriu Ajénsia TATOLI ba dala-3 ne’e, TATOLI tenke sai “frente” da “construction of reality”.

“Ha’u hanoin TATOLI sai fonte kredivel ba notísia iha Timor-Leste liuliu iha kapasidade no abilidade atu halo “construction of reality”. Ne’e signifika ema bele haree realidade sosiál, ekonomia, polítika, psikolojia, kultura no seluk tan liuhusi “eskrita”. Bainhira imi hakerek sala, ema lee sala no realidade sei la eziste. Ha’u hakarak dehan TATOLI tenke sai “frente” ba “Construction of  Raelity,” hateten Padre Martinho G. da Silva Gusmão, ba Ajénsia TATOLI liuhosi entrevista via rede sosiál.

Ezemplu, nia esplika,  jornalista TATOLI hakerek “ASEAN Laiha “Obsesaun” Ba TL Atu Sai Membru”, signifika katak ASEAN rejeita TL, ne’e grave (fatal). Tan konteúdu hatudu fali ASEAN laiha “objesaun”, katak ASEAN bele ona simu TL.

Iha biban ne’e TATOLI sai tebes ona “frente” “construction of reality”, nia hatán, la’ós de’it TATOLI maibé mídia komunikasaun sira iha Timor-Leste laiha ida mak halo no seidauk sai frente ba “construction of reality”. Tanba, mídia sira la halo analiza forte ne’ebé fó impaktu ka fó efeitu atu ukun na’in sira foti desizaun.

“Ita-nia mídia laiha “analista espesializada”, nune’e imi foti analiza sira hosi rai seluk kona-ba sira-an de’it hanesan ita xupa xupeta. Se iha analiza mós, ita la selu, entaun ha’u sente mídia komunikasaun sira iha Timor-Leste, sai fatin ba “pemerasan intelektual”.

Nia husu, Estadu Timor-Leste tenke investe makas iha rekursu umanu. Maibé, tuir nia, se Estadu investe ona iha rekursu umanu maibé depois servisu ho kondisaun “miseravel” hela, ne’e mós hanesan soe osan-mean ba fahi-diuk.

Entaun, nia hatutan, di’ak liu Estadu tenke investe makaas liu ba kultura livru no kultura ba lee. “Tuir ha’u-nia haree, Estadu tenke investe makaas liu ba ‘cultura do livro e leitura’. Tenke iha ‘gabinete’ ne’ebé tau-matan makaas ba ‘produção livro’. Labele husik eskritór sira, analista sira no jornalista sira moris iha pobreza nia laran,” Martinho esplika.

Jornalista          : Cancio Ximenes

Editór                : Rafy Belo

HAKEREK NO HATÁN

Please enter your comment!
Please enter your name here