Prezidente TATOLI. I.P, José da Costa. Imajen Tatoli/Egas Cristóvão

DILI, 31 jullu 2019 (TATOLI)—Prezidente Agência Tatoli, I.P, José da Costa hateten maski TATOLI sei sai Institutu Públiku ida loloos (la’ós ona embriaun), maibé mehi la’ós para de’it iha Institutu Públiku.

“Ami-nia mehi la’ós para de’it ho títulu Institutu Públiku. Ami-nia mehi, mak nu’udar ajénsia notisioza ida Estadu nian, bele presta serbisu públiku ida loloos, nu’udar nia obrigasaun própria, ho profesionál, kredível, rigór no kualidade iha nia produsaun notísia no informasaun ba públiku, hodi tulun konsolida ita-nia estadu ba dezenvolvimentu nasionál,” José da Costa dehan liuhusi ninia diskursu iha aniversáriu Tatoli ba datoluk (27 jullu 2016-27 jullu 2019) iha Timor Plaza, ohin.

Ba ida ne’e, nia dehan, hosi kedas loron ne’ebé simu pose, nia aposta ba foku importante rua iha mandatu tinan 4 nian maka hanesan dezenvolvimentu institusionál, expansaun konteúdu no kualidade iha produsaun informasaun ba públiku.

“Nu’udar instituisaun foun ida, ami haree katak iha nesesidades boot tebes atu konsentra hodi dezenvolve instituisaun refere, hosi aspetu regra no sistema serbisu, rekursu umanu, finanseiru ne’ebé adekuadu, fasilidade inklui espasu sufisiente ba hala’o serbisu. Nune’e mós ba formasaun no kapasitasaun, inklui parseria ho órgaun komunikasaun sosiál sira iha rai laran, no mós ajénsia notisioza sira rai li’ur, ne’ebé sei permiti ba expansaun no kobertura iha nível hotu-hotu tantu lokál, nasionál, rejionál no internasionál,” José haklaken.

Eventu ida ohin, tuir Prezidente Tatoli, marka loron foun ida iha jornada TATOLI nian ba oin.

“Loron ne’ebé ami hotu hein atu fó serteza ba ami-nia pasu sira mai oin nian, katak iha sinál di’ak, atu hahú hakat ba oin, ho fiar án liu-tan, tanba iha apoiu sira ne’ebé sei kontinua naksulin mai ami hosi parte hotu-hotu. Ita-boot sira nia prezensa demonstra konfiansa ida ne’e,” nia tenik.

Jornalista: Zezito da Silva

Editór: Xisto Freitas

HAKEREK NO HATÁN

Please enter your comment!
Please enter your name here