Koordenadór Komisaun Organizadora ba loron Konsulta Populár da-20, Hugo Maria Fernandes. Imajen Tatoli/Egas Cristóvão.

DILI, 31 jullu 2019 (TATOLI) – Koordenadór Komisaun Organizadora ba Loron Konsulta Populár ba dala-20, Hugo Fernandes, informa abertura ba komemorasaun Loron Konsulta Populár hahú ohin iha munisípiu Lautein.

“Programa tuir kalendáriu sei hahú iha munisipiu Lautein no iha munisipiu Lautein sei loron rua, 31 jullu to’o 1 agostu”, dehan Hugo iha konferénsia imprensa iha Palásiu Governu tersa ne’e.

Programa importante ne’ebé husi nasionál prepara mak haruka artista sira bá munisípiu ne’ebé hanaran konsertu hale’u munisípiu ne’ebé kompostu husi Grupu Lahane no grupu artista sira ne’ebé uluk iha tempu rezisténsia kanta múzika sira.

Grupu hirak ne’e, sei kanta múzika obrigatóriu maka Oras To’o Ona, Loron Aban Hahú Ohin no múzika Mate Mohu.

Programa seluk mak husi komisaun organizadora prepara matéria liuliu ba eventu sira ne’ebé akontese iha 1999 hahú husi janeiru bainhira eis Prezidente Repúblika Indonézia B.J Habibie anunsia referendu ba Timor-Leste to’o dezembru.  Aléinde ne’e sei iha mós aprezentasaun sira hanesan dansa kultura ne’ebé lidera husi Sekretáriu Estadu Arte no Kultura.

Kona-ba atividade iha Dili, Koordenadór Komisaun Organizadora dehan sei hala’o iha loron 3 agostu, sei iha debate públiku ne’ebé sei organiza husi Komisaun Justisa no Pás.

Iha biban ne’e, Koordenadór media center atuál Prezidente Ajénsia TATOLI, José da Costa, hatete hahú ohin sentru mídia ativa liga ba loron konsulta populár ne’e.

Ekipa sira sei prontu hodi divulga informasaun sira ne’ebé relasiona ho eventu importante Konsulta Populár tinan ne’e.

“Ami komprometidu katak ami informa kestaun sira ne’ebé maka liga ho eventu Konsulta Populár tinan ne’e ba públiku para kontinua akompaña”.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here