DILI, 31 jullu 2019 (TATOLI)-Jornalista seniór timoroan no atuál Vise-Prezidente Timor-Leste Press Union (TLPU), Jordão Henrique, husu ba instituisaun Estadu tomak liuliu Governu atu aproveita másima Ajénsia Notisioza Tatoli hanesan meiu komunikasaun sosiál ida ne’ebé kredivel iha Timor-Leste (TL).
“Ajénsia Notisioza Tatoli ne’e reprezenta Estadu Timor-Leste ne’ebé membru Governu tenke fó atensaun másima hodi hatene papél ajénsia Tatoli, se la’e sira (membru Governu) hanoin ne’e online bainbain la’ós na’in ajénsia ofisiál Estadu nian”, Jordão afirma bainhira partisipa iha selebrasaun aniversáriu Tatoli ba datoluk iha Timor Plaza, ohin.
Jornalista ne’e sente triste tanba Iha aniversáriu Tatoli no transformasaun TATOLI embriaun ba TATOLI.IP, maibé partisipasaun membru Governu mínimu tebes.
Maski triste, maibé Jordão ho esperansa no orgullu katak Tatoli foin tinan tolu ho ekipa ne’ebé ki’ik, mas konsege reforsa ona ezistensia Tatoli iha Timor-Leste.
“Ami mós prontu fó apoiu ba Ajénsia Tatoli liuhusi esperiénsia ne’ebé ami iha durante ne’e servisu ho ajénsia internasionál”.
Nia adianta katak, bá oin Ajénsia Tatoli tenke sai ona hanesan ajénsia sira seluk iha mundu liuhusi publikasaun notísia no TV.
Jornalista: Florencio Miranda Ximenes
Editora: Maria Auxiliadora