Akadémiku Dili Institute of Technology (DIT), Manuel Florêncio Vong . Foto espesiál

Dili, 31 jullu 2019 (TATOLI) – Akadémiku Dili Institute of Technology (DIT), Manuel Florêncio Vong kongratula no dezeju susesu ba Ajénsia Notisioza Timor-Leste, TATOLI, I.P ba komemorasaun aniversáriu no transformasaun embriaun ba Institutu Públiku (IP).

“Maske susar no terus hotu ajénsia notisioza Timor-Leste ne’e enfrenta maibé espíritu vontade kontinua fó nafatin korajen ba sira hodi hakat nafatin ba oin,” hateten Akadémiku Manuel Vong ba jornalista TATOLI, I.P iha serimónia aniversáriu TATOLI,I.P nian iha Timor Plaza, ohin.

“Primeiru ha’u hakarak fó parabéns ba TATOLI tanba durante ne’e hala’o ninia servisu ho susesu. Tinan tolu ha’u akompaña TATOLI ninia peregrinasaun kuaze mensajen sira kredivel iha prosesu divulgasaun informasaun ba públiku,” tenik akadémiku ne’e.

Vong hateten TATOLI diversifika ninia notísia sira ba públiku ne’e bele dehan edukativu tanba tulun duni ema atu komprende kona ba informasaun ne’ebé akontese iha rai laran.

Tanba ne’e mak espetativa TATOLI, I.P nian ba oin tenke hatuur nafatin ninia aan atu hala’o misaun ida ne’e ho di’ak liután nu’udar fonte ka kanál estadu ninian para bele transforma informasaun ida edukativu nafatin.

“Ha’u dezeju felisidade no susesu nafatin ba TATOLI hamutuk ho ninia dirijente, jornalista inklui ekipa tomak ne’ebé servisu maka’as ona hodi lori TATOLI to’o ohin loron,” dejeza akadémiku DIT ne’e.

Jornalista     : Tomé Amado

Editór             : Rafy Belo

HAKEREK NO HATÁN

Please enter your comment!
Please enter your name here