DILI, 30 jullu 2019 (TATOLI)-Diretór Delegasaun Programa Nasionál Dezenvolvimentu Suku (PNDS) Munisípiu Dili, Tadeo Francisco de Araújo Soares, hatete PNDS benefisia ona rezidente sira iha suku 30-resin iha munisípiu refere.

Tanba liuhusi programa ne’e bele reabilita eskola sira iha Dili inklui fó mós asisténsia ba abitante sira hodi asesu bee-moos no hadi’a ponte balun.

“Ita komesa reabilita eskola foun iha Metiaut no alunu sira maka uza ona sala ne’e. Ba bee-moos iha parte Balibár nian kuaze abitante mil e tal maka asesu ba iha konstrusaun no kanalizasaun. Aléinde ne’e haree ba iha inundasaun ba ezgotu iha bairru sira”, Tadeo dehan ba jornalista TATOLI iha Administrasaun Munisípiu Dili, ohin.

Nune’e mós konsege reabilita ona drainajen lubuk ida inklui halo konstrusaun ba fatin lixu nian iha suku balun.

Husi atividade PNDS Dili nian ne’e, rezidente husi suku 30-resin iha munisipiu refere husu ba Governu atu kontinua programa planu nasionál dezenvolvimentu suku tanba hotu-hotu sente ona benefísiu.

“Sira husu Governu atu kontinua tau atensaun ba iha programa PNDS rasik atu hare filafali difikuldade balun hodi kompleta liután buat sira ne’ebé seidauk halo”.

Tadeo haktuir planu ba tinan oin katak komesa haree ba prioritizasaun kada suku atu nune’e saida maka presiza atu halo liuliu halo identifikasaun ba suku idak-idak iha munisípiu Dili.

“Ami sei haree hodi diskute iha fulan ida ou rua mai, saida maka ita presiza prioritiza iha 2020  atu halo”.

Tanba ne’e nia husu ba abitante sira iha Dili atu kontinua kolabora ho parte hotu nune’e bele fó apoiu ba programa PNDS atubele halo dezenvolvimentu ba suku ho di’ak liután.

Suku sira iha Dili :http://www.mof.gov.tl/about-the-ministry/statistics-indicators/sensus-fo-fila-fali/download-suco-reports/dili-suco-reports/?lang=tl

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here