Lider na'in rua, Taur Matan Ruak no Francisco Guterres Lú Olo hakuak malu hafoin enkontru iha Palásiu Prezidente Nicolau Lobato. Imajen Mídia PR

DILI, 29 jullu 2019 (TATOLI)—Prezidente Repúblika (PR), Francisco Guterres Lú Olo, bolu Primeiru Ministru (PM), Taur Matan Ruak hodi diskute kona-ba prosesu alterasaun lei haat ne’ebé semana kotuk Parlamentu Nasionál aprova ona hosi Parlamentu Nasionál (PN).

Lei haat ne’e Parlamentu Nasionál haruka ona ba Prezidente Repúblika iha semana kotuk.

Lee mós:

PN Aprova Rezolusaun Ratifikasaun Tratadu Entre RDTL no Austrália iha Finál Globál

PN Aprova Ona Proposta Lei Haat iha Finál Globál

Aprovasaun Lei Haat Sei Hetan Benefísiu Hosi Ratifikasaun Tratadu Foun

“Prezidente Repúblika mak bolu ha’u atu mai ko’alia kona-ba lei no dekretu lei sira ne’ebé haruka mai, espesiálmente lei sira ne’ebé iha relasaun ho asina tratadu iha 30 agostu nian ne’e,” dehan PM Taur hafoin ramata soru-mutu ho PR Lú Olo iha Palásiu Prezidente Nicolau Lobato, Bairru Pite, ohin.

Taur  hasara Prezidente Repúblika nia liafuan katak, loloos, lei mak tenke tama uluk hafoin dekretu lei tuir. “Maibé, ami haruka tiha dekretu lei sira mai uluk antes lei sira Parlamentu aprova iha semana kotuk haruka mai Prezidente Repúblika. Entaun, internu halo hela ajusta ida oinsá bele hadi’a ida ne’e. Normalmente, Prezidente simu uluk lai lei hafoin simu fali dekretu lei,” Taur haktuir.

Proposta alterasaun lei hirak ne’e mak hanesan lei númeru 5/V, segunda alterasaun lei 9/2015 3 agostu kona-ba Lei Fundu petrolífera.

Proposta lei númeru 6/V- primeira alterasaun lei númeru 8/2008, 30 juñu kona-ba Lei Tributária no primeira alterasaun lei númeru 3/2003, 1 jullu kona-ba Tributasaun Kontrante ba Bayu Undan.

Nune’e mós primeira alterasaun lei númeru 4/2003, 1 jullu kona-ba Dezenvolvimentu Petróleu iha Tasi Timor (estabilidade tributária); segunda alterasaun lei númeru 13/2005, 2 setembru- Lei Atividade Petrolífera.

Ikus liu, proposta númeru 7/V-Rejime Laborál no Migratóriu Espesiál Aplikável ba Projetu Bayu-Undan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here