Obra Igreja Ai-mutin.

DILI, 30 jullu 2019 (TATOLI)-Padre Parókia São José Ai-mutin, Emanuel Lelo Talok C.M.F,  informa, hahuú hosi tinan 2015 to’o 2019, parókia simu ona orsamentu milloens $2 resin hosi Governu hodi finansia projetu konstrusaun Igreja Ai-mutin ne’ebé tuir planu  tenke finaliza iha Dezembru 2020.

“Maske ami hein kleur, maibé ida ne’e hanesan grasa ida mai ami bele kontinua fali obra ne’e,” informa Padre Emanuel Lelo Talok, ohin, iha Ai-mutin, Comoro, Dili.

Padre Pároku ne’e dehan tan, total fundu ba projetu ne’e hamutuk milloens $4.6. enkuantu milloens tolu simu hosi Governu liuhosi apoiu fundu sosiedade sivíl no milloens $1.6 responsabiliza hosi Igreja Ai-mutin.

“Agora daudaun serbisu hahú fali ona tanba orsamentu hosi governu tama fali ona,” hateten Padre Emanuel Lelo Talok.

Nia hateten, prosesu konstrusaun durante ne’e atraza tanba problema  orsamentu  hodi  difikulta kompañia CBMI Ltd hosi Xina hodi ezekuta projetu ne’e. Maibé daudaun ne’e kompañia CBMI kontinua hikas obra ne’e hodi finaliza iha etapa dahuluk nian.

“Faze finalizasaun obra ne’e   sei implementa hosi kompañia Artha Dili unipessoal Lda hosi Indonézia,” informa Padre Emanuel Lelo Talok.

Projetu konstrusaun Igreja Ai-mutin ne’e hahú iha fulan Agostu 2015 ne’ebé lansa hosi eis Primeiru-Ministru, Rui Maria de Araújo.

Jornalista          : Agapito dos Santos

Editór                : Francisco Simões

HAKEREK NO HATÁN

Please enter your comment!
Please enter your name here