Konsellu Imprensa (CI-Sigla Portugés) liuhosi Diresaun Análize Mídia fó sai nia rezultadu monitorizasaun ba produtu jornalístiku iha salaun HAK, Farol, ohin.

DILI: 30 jullu 2019 (TATOLI) Konsellu Imprensa (CI-Sigla Portugés) liuhosi Diresaun Análize Mídia rejista ona Órgaun Komunikasaun Sosiál (KomSos), ne’ebé komete infrasaun kódigu étika hamutuk 77, hahú hosi 2016 to’o 2019.

“Númeru infrasaun ne’ebé mídia sira komete hamutuk 77, hosi 2016 hamutuk 16, 2017 iha 20, 2018 iha 30, enkuantu hosi Janeiru to’o maiu 2019 hamutuk 11″ relata Diretór Análize Mídia, Alberico Junior, iha salaun HAK, Faról, ohin.

Métodu monitorizasaun ne’ebé KI uza maka formatu espesiál hanesan haree ba konteúdu notísia, prinsípiu sira jornalista, aspetu legál no valór notísia bazeia ba kódigu étika jornalista nian inklui lei KomSos.

“Ami nia monitorizasaun no análize ne’e ba produtu jornalístika hosi kanál mídia hanesan RTTL,EP, Ajénsia Notisioza Tatoli, GMN TV, Diáriu Nasionál, Timor Post, STL, Independente, Tempo Timor, Tafara no Dili Post”, subliña Alberico Junior. Hodi hatutan ninia parte mós halo karta xamada ba instituisaun mídia.

Hodi dehan KI haruka karta xamada hamutuk 10 ba Rádiu Televizaun Timor-Leste, Empreza Públika (RTTL,EP), Grupu Mídia Nasionál (GMN) iha neen, Independente iha tolu, Timor-Post mós tolu, Dili Post ida inklui Tempo Timor ida.

“Ami halo karta xamada ba instituisaun sira ne’e tanba infrasaun ne’e boot. Karta xamada ne’e halo ho intensaun atu lakohi lori jornalista ida ba tribunál atu bele garante liberdade imprensa no espresaun”, katak.

Aleinde ne’e mós, KI mós simu keixa hosi jornalista sira ba kazu violasaun rua, hanesan ameasa no diskriminasaun haat, intervensaun ba redasaun ida, retifikasaun haat, mediasaun rua, hapara kontratu ida no karteira profisionál ida.

Iha fatin hanesan, Prezidente Internu KI, José Ximenes, dehan KI hala’o karta xamada hanesan meiu ida atu fasilita jornalista no kanál sira atu hadi’a produtu jornalístiku hodi evita konsekuénsia legál no ameasa sira seluk iha futuru.

Tanba ne’e, KI rekomenda konsellu redasaun  tenke independente atu garante lia-loos no públiku nia direitu ba asesu informasaun no presiza iha espasu  iguál ba parte hotu-hotu.

“Ita tenke kontinua kaer metin ita nia mata dalan mak kódigu étika jornalista no lei komunikasaun sosiál atu evita konsekuénsia no risku legál iha futuru“ afirma José Ximenes.

Jornalista: Florencio Miranda Ximenes

Editór     : Maria Auxiliadora

HAKEREK NO HATÁN

Please enter your comment!
Please enter your name here