Tribunal Distritál Dili.

DILI, 30 jullu 2019 (TATOLI) – Defeza ba arguida LVA ho ATS husu ba tribunal liuhosi Juis Yudi Pamukas, atu absolve arguida sira hosi akuzasaun Ministériu Públiku (MP) nian.

Arguida LVA nu’udar diretóra ida iha Konsellu Imprensa (CI-sigla protugés) hetan akuzasaun hosi MP  ho kazu “pekulatu ba uzu” no arguida ATS nu’udar mós diretóra ida iha CI hetan akuzasaun “abuzu poder”.

Notísia Relevante : Prezidente CI “Surpreza” ho Kazu Diretora CI Na’in Rua iha Tribunál

Kazu “Pekulatu ba Uzu” iha CI, TDD Rona Testemuña Na’in Neen

Kareta Estadu ne’ebé husi CI. Imajen/TATOLI

Liuhosi kontinuasaun audiénsia julgamentu, ohin, iha Tribunal Distritál Dili (TDD), Defeza ba arguida ho inisiál LVA, Elda Batista ho Defeza ba arguida ATS, Cesaltina M. Afonso do Santos, husu ba Juis Yudi Pamukas, atu absolve arguida na’in rua hosi alegasaun Ministériu Públiku ne’ebé reprezenta hosi  Prokuradór Adérito Tilman, tanba arguida LVA la halo “pekulatu ba uzu” ba patrimóniu estadu nian ne’ebé pertense ba patrimóniu CI nian tanba iha karta autorizasaun hosi diretór interinu CI nian, inklui absolve akuzasaun ba arguida ATS tanba la komete ‘abuzu podér’ ba nia desizaun hodi asina karta autorizasaun uzu karreta estadu ba arguida LVA tanba sentidu umanu no refere mós ba esperiénsia ne’ebé durante ne’e la’o iha CI hodi ajuda fasilita funsionáriu hotu uza karreta Estadu ba interese privadu, hanesan lia mate no lia moris.

Defeza Elda Batista ne’ebé fó asisténsia legal ba arguida LVA argumenta katak,  razaun forte tebes husu Juis ‘absolve’ arguida LVA tanba antes ne’e funsionáriu hotu iha CI nian, inklui membru CI nian sira ho mós Fiskál Úniku ne’ebé sai testemuña ba kazu ne’e mós uza karreta sira ne’e ba atividade privadu naran katak iha pedidu ou formuláriu formal, nune’e ho ámbitu nee mak arguida LVA husu asinatura ba ATS atu hala’o servisu CI nian kona ba workshop étika jornalizmu iha Kupaun, au-mézmu tempu, lori oan ba konsulta tanba nu’udar inan ida.

Kona-ba kustu mkombustivel, arguida LVA mak hasai nia osan rasik hodi sosa gazolina tau karreta, kondisaun karreta di’ak hotu no laiha problema, tanba ne’e, la hamosu prejuizu ba Estadu.

“Iróniku tebes. CI fó tratamentu hanesan ba funsionáriu hotu atu uza karreta estadu ba situasaun sira ne’ebé importante mezmu interese privadu tanba sentidu umanu, maibé ba kazu ida ne’e mosu fali iha MP, maske funsionáriu sira hotu, membru sira CI nian, inklui mós Fiskál Úniku  mós uza karreta ne’e ba interese privadu. Mas la mosu iha MP. So ba arguida na’in rua ne’e mak tenke simu todan hotu. Tanba ne’e husu MP atu loke mós investigasaun kle’an ka profunda ba kazu sira utilizasaun patrimóniu estadu iha CI,” afirma  Elda Batista nu’udar Defeza ba arguida LVA.

Arguida na’in rua mós konfesa tiha ona ba Tribunal katak sira na’in rua mós arrepende ona sira nia hahalok hodi kompromete atu iha futuru  sira na’in  rua sei uza karreta estadu ho loloos no di’ak.

Iha alegasaun final Ministériu Públiku  akuza krime rua lahanesan ba arguida na’in rua; ba arguida LVA akuza ba krime “Pekulatu ba Uzu” ne’ebé mak previstu iha artigu 398 no arguida ATS akuza ba krime “abuzu  podér”  ne’ebé previstu iha artigu 297 kódigu penal Timor-Leste.

Ministériu Públiku liuhosi Prokuradór Adérito Tilman, husu mós Tribunal atu aplika pena suspensaun no kustu judisiais. Tanba tuir MP nia haree katak arguida na’in rua iha duni intensaun atu asina formuláriu hodi uza veíkulu estadu ba objetivu privadu inklui mós lori oan ba konsulta la’ós ba interese estadu.

Rona tiha alegasaun hosi MP no kontestasaun hosi defeza, Juis Yudi Pamukas, deside   adia fali  julgamentu ba loron 26 Setembru 2019, tuku 04:00 lokraik OTL, hodi rona desizaun final.

“Ita adia kleur uitoan to’o Setembru tanba iha Agusto ne’e nia laran sei iha ferias judisiais,”  hateten Juis Yudi Pamukas.

 Akuzasaun MP

Iha loron 6 fulan Dezembru 2018 arguida LVA halo pedidu ba diresaun transporte (DNTT) husu autorizasaun atu uza karreta ho marka Toyota Hilux ho xapa matríkula 06-377G atu transporta ba Kupaun, Indonézia, katak atu hala’o servisu CI nian, maibé la aneksa ho konvite ruma.

Iha loron 10 to’o loron 14 fulan Dezembru, arguida ATS delega nia kompeténsia ba funsionáriu ORC atu assume nu’udár diretór interinu.

Iha momentu nee bainhira atu sai ba Kupaun, arguida LVA haruka dokumentu formuláriu ida ba diretór interinu ORC atu asina para halo viajen ba Kupaun hodi konsulta oan moras. Maibé iha momentu ne’ebá diretór interinu asina tiha mas retira fali.

Momentu ne’ebá arguida LVA haruka kedas nia kondutór na’in ida lori karta nee ba fali Arguida ATS mak asina, maski formuláriu laran la nota kona-ba atu halo atividade servisu nian iha Kupaun .

Arguida sira halo duni viajen ba Kupaun iha loron 12 Dezembru hodi aproveita iha sira nia loron ferias annual.

Ho hahalok sira nee, Ministériu Públiku uza nia kompeténsia tomak, akuza arguida na’in rua ho krime rua, abuzu de podér tuir artigu 297, no hosi Kódigu Penal Timor-Leste nian.

Jornalista : Domingos Piedade Freitas

Editór       : Xisto Freitas

HAKEREK NO HATÁN

Please enter your comment!
Please enter your name here