Prezidente Tribunál Rekursu (PTR), Deolindo dos Santos. Imajen/Egas Cristóvão

DILI, 29 jullu 2019 (TATOLI)—Prezidente Tribunál Rekursu (PTR), Deolindo dos Santos, hala’o soru-mutu ho Prezidente Repúblika (PR), Francisco Guterres Lú Olo, ko’alia kona-ba serbisu ne’ebé la’o iha Tribunál.

“Reuniaun ne’e ko’alia kona-ba oinsá Tribunál bele hala’o serbisu ne’ebé di’ak liu-ba ema hotu, nune’e bele aselera kazu la’o lais liu. Tuir dadus ne’ebé iha, prosesu kazu sira iha Tribunál Distritál dadaun ne’e menus ona kompara ho fulan hirak liu-ba kotuk. Hanesan Baucau, tinan hirak ba kotuk, prosesu kuaze rihun ida ba leten, maibé dadaun ne’e hela de’it kazu pendente atus haat resin ba kazu krime no sivíl. Oé-Cusse hanesan mós ho Baucau nian. Enkuantu, Dili no Covalima mak númeru aas tanba atus ualu to’o rihun rua ba leten,” Deolindo ba jornalista sira iha Palásiu Prezidente Nicolau Lobato, Bairru Pité, ohin.

Iha Tribunál Rekursu,  nia haktuir, uluk ne’e kazu sivíl iha atus tolu resin maibé agora tún ona ba 25 no kazu krimi iha atus ida ruanulu.

Aleinde ne’e, parte rua diskute mós kona-ba oinsá iha tempu besik Tribunál haruka juiz na’in lima no ofisiál justisa na’in neen ba tuir formasaun iha estranjeiru nune’e bele aumenta di’ak liu-tan kapasidade no koñesimentu ba serbisu justisa nian.

Entretantu, Prezidente Repúblika enkoraza no husu Tribunál tenke hala’o nafatin serbisu lais liu nune’e povu hotu bele sente satisfeitu ho prosesu justisa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here