Komunidade Dili hahú dada bandeira nasionál iha sira nia uma oin hodi komemora tinan 20 konsulta populár no festa prezensan forsa INTERFET nian iha Timor-Leste. Imajen/Ozória A. Marques

DILI, 29 jullu 2019 (TATOLI)-Atu komemora tinan 20 loron konsulta popular (30 Agostu 1999-30 Agostu 2019) no prezensa Forsa INTERFET iha Timor-Leste (20 Setembru 1999), komunidade iha Kapitál Dili hahú dada bandeira nasionál (RDTL) iha sira nia uma oin.

Jornalista Ajénsia TATOLI observa katak, iha semana rua ikus-ikus ne’e, komunidade ua’in ne’ebé horik iha Dili laran, liuliu hirak ne’ebé hela iha estrada protokolu nia ibun komesa hasae bandeira RDTL iha sira nia uma oin.

La’os ne’e deit, negosiante estranjeiru sira ne’ebé hala’o sira nia atividade negósiu iha Dili, hanesan iha Kampun Alor, Colmera,  Audian, Hudi Laran, Comoro, Lecidere, Bidau no Becora, komesa dada bandeira iha sira ida-idak nia loja oin no edifísiu kompañia nian.

Silveira Dato, nu’udar abitante Suku Becora,  hateten, nu’udar timoroan iha obrigasaun polítika no obrigasaun moral atu hasae bandeira nasionál iha ida-idak nia uma oin atu fó  louvor ba timoroan sira nia sakrifisiu, liuliu eroi  sira  sakrifisiu hodi nakfilak rai ne’e sai ukun rasik an.

“Ha’u dada bandeira ho ha’u nia konsiénsia rasik. La iha ema ida ka autoridade ida mak tenke mai orienta ha’u atu dada bandeira iha ha’u nia uma oin,” hateten Silveira Dato, ohin, iha loja Sander Robert Thuenes

Nia lia tun tan,  dada bandeira  la presiza simu orientasaun ruma hosi autoridade governu, maibé ho sentidu Timoroan hatudu ba mundu katak Timor-Leste  komemora loron konsulta populár ne’ebeé importante ba Timor nia autodeterminasaun.

Governu liuhosi servisu Autoridade Munisípiu Dili, foin lalais, apela ona ba komunidade iha Dili atu hahú dada bandeira iha sira nia uma oin hodi komemora loron Istóriku ne’e.

Jornalista          : Ozória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here