Koordenadór AIFAESA, Abílio Oliveira Sereno. Imajen/Jogerjo Guterres.

DILI, 29 jullu 2019 (TATOLI)-Autoridade Inspesaun no Fiskalizasaun ba Atividade Ekonómika, Sanitária no Alimentár, Institutu Públiku (AIFAESA, I.P) prontu ona atu destaka funsionáriu ba iha rejiaun haat hanesan Baukau, Ainaru, Bobonaru no Rejiaun Administrativa Espesiál Oekusi-Ambenu (RAEOA), maibé seidauk realiza tanba sei hein diploma ministeriál.

Objetivu destakamentu  funsionáriu sira ne’e atu halo inspesaun ba atividade ekonómika no kontrolu kualidade ba produtu ai-han no la’ós ai-han.

“Atu tau funsionáriu sira iha munisípiu iha buat tolu, primeiru, tenke iha rekursu umanu, maibé daudaun ne’e ami-nia rekursu iha ona, segundu, kondisaun iha munisípiu más autoridade munisípiu sira, ami halo ona kontaktu, konfirmandu ona no sira prontu atu simu ami-nia funsionáriu, no terseiru maka tenke iha diploma ministeriál ida bele autoriza destakamentu, no agora falta de’it diploma ne’e”, Koordenadór AIFAESA, Abílio Oliveira Sereno, hatete iha nia kna’ar fatin, Matadouru, ohin.

Abílio Oliveira dehan diploma ministeriál daudaun ne’e iha ona Gabinete Jurídiku AIFAESA nian no sei lori bá Konsellu Ministru hodi deside, nune’e bele ona halo destakamentu bá iha fatin sira ne’e.

Abílio dehan vantajen hosi destakamentu ne’e iha buat rua de’it mak redús despeza Estadu katak bainhira iha ona funsionáriu destakadu laiha tan ona osan ba viajen no  kuandu iha ona destakamentu funsionáriu sira bele bá halo inspesaun loron-loron.

Tuir planu AIFAESA sei haruka nia funsionáriu iha rejiaun ida na’in-lima. Daudaun ne’e ekipa inspesaun kontinua halo inspesaun ba estabelesimentu sira iha Dili.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here