DILI, 27 jullu 2019 (TATOLI)-Negosiante barak mak seidauk iha konsiénsia atu kolabora hodi asegura sidade Dili moos no furak. Tanba ne’e, negosiante sira la preokupa ho avizu, maibé sira hafuhu de’it, bainhira ekipa konjunta halo operasaun sira la fa’an sai iha estrada ninin, mas kuandu ekipa konjunta la halo operasaun, sira kontinua fa’an fali de’it iha estada ninin.
Adjuntu Munisípiu Dili, José Filipe Ximenes Smith, fó ezemplu konkreta mak negosiante sira iha estrada ibun antigu Merkadu Comoro.
“Bainhira ekipa konjunta halo operasaun, negosiante sira iha parte ne’ebá la brani fa’an iha estrada ninin. Mas, minutu balun mak ekipa konjunta la halo operasaun, ne’e sira aproveita másima kedas hodi fa’an atu tama to’o estrada laran,” hateten José Filipe Ximenes Smith, ba Ajénsia Tatoli iha nia servisu fatin, sesta (26/07/2019).
Adjuntu Munisípiu Dili, José Filipe Ximenes Smith, hateten, negosiante sira la dun iha konsiénsia tanba sira hakarak duni atu implementasaun ho rigor hosi regra no lei.
“Kuandu iha ona Lei forte para regulariza sira hodi fó sansaun koima, maka sira foin hakfodak no ta’uk. Mas ita uza fuan hodi husu sira nia kolaborasaun, mas sira kontinua la rona,” hateten José Smith.
Mezmu negosiante balun ‘ulun to’os’ mas Administrasaun Munisípiu Dili la lakon vontade atu kontinua servisu ba Dili nia furak no moos.
Jornalista : Osória A. Marques
Editór : Francisco Simões
