Espoza Prezidente Repúblika, Cidália Nobre Lopez Mouzinho Guterres hola produtu lokál ne’ebé komunidade fa’an iha área Ponte Loes, Liquiçá. Imajen Tatoli/Cipriano Colo

ATABAE, 27 jullu 2019 (TATOLI)—Komunidade Suku Aidaba Leten, preokupa ho kondisaun uma iha dalan protokolu Atabae to’o Batugade, ne’ebé oras ne’e iha dalan ninia maioria komunidade sei hela ho uma talin.

Preokupasaun ne’e mosu tanba haree katak, tuir loloos, komunidade tenke konsistente ona no esforsu atu hadi’a uma sira tanba ema estranjeiru tama sai rai laran sempre liuhosi dalan ne’e—kondisaun ne’e sei hamosu imajen ladi’ak ba bainaka sira.

Tanba ne’e, durante semináriu ne’ebé organiza hosi Irman sira hosi Kongregasaun Suster Misi Abdi Roh Kudus ne’ebé koñesidu ho “S.Sp.S.“, Komunidade Ailok Laran, Aldeia Tasi Mean, Suku Aidaba Leten, Postu Administrativu Atabae, Munisípiu Bobonaro, sábadu (27/7), Abel Fontes  husu ba Autoridade Munisipál atu hamosu polítika ida hodi rezolve kestan sériu ne’e.

Nia hateten, se Atabae sai hanesan odamatan Timor-Leste nian, maka pelumenus kondisaun uma komunidade nian presiza hadi’a, tanba ne’e husu ba Prezidente Autoridade Munisipál atu serbisu hamutuk ho Governu Sentrál, oinsá hamosu polítika ida ne’ebé bele rezolve kestaun refere.

“Prezidente Autoridade tenke kria polítika ida serbisu hamutuk ho Governu Sentrál, atu uma talin sira iha estrada ibun ne’e ita sobu,” Abel Fontes hateten.

Nia hatutuan, objetivu hosi sobu uma talin hirak ne’e atu kria imajen di’ak ba nasaun, tanba ne’e husu Espoza Prezidente Repúblika atu hato’o ba Governu Sentrál, nune’e pelumenus hahú hosi Tibar to’o Batugade tenke uma mutin hotu.

Hatán ba preokupasaun ne’e, Espoza Prezidente Repúblika, Cidália Nobre Lopez Mouzinho Guterres, hateten nia mós preokupa ho kondisaun uma sira iha dalan protokolu, la’ós de’it iha Tibar to’o Batugade no Atabae, maibé inan nasaun ne’e mós sempre preokupa ho uma sira iha dalan protokolu iha sidade Dili.

Nia hateten, iha Dili laran de’it mós kondisaun uma barak ladún di’ak ne’ebé ladún fó imajen di’ak ba nasaun, tanba uma sira iha dalan ninian de’it mós komunidade ladún preokupa atu tau matan didi’ak, pinta no hamoos. Maski simples ba, maibé pelumenus hadi’a netik, nune’e ema haree furak.

‘‘Ita kuandu sai ba ema nia rain, ita to’o iha aeroporu ne’e sempre haree buat foun. Ita nian fali, bainhira ita tuun hosi aviaun, ita haree laduun furak. Dalaruma tanba ita duni mak vontade laiha atu hadi’a ita nia kondisaun, liliu laiha polítika di’ak ba ida ne’e,” Cidália haktuir.

Tuir Cidália nia observsaun katak Timor nia toman ne’e baibain gosta hamoos iha loron boot de’it, liu tiha la hamoos ona.

Nia tenik, timoroan sira osan barak, maibé dala barak uza osan ne’e hodi halo lia, maibé haluha tiha atu hadi’a kondisaun moris.

Asuntu importante ne’e, inan nasaun ne’e sei toma nota no sei hato’o ba Prezidente Repúblika atu bele hato’o ba Primeiru-Ministru iha sira nia enkontru semanál.

Iha fatin hanesan, Prezidente Autoridade Munisípiu Bobonaro, Zeferino Soares dos Santos, hateten kona-ba abitasaun, polítika Oitavu Governu Konstitusionál iha ona planu atu halo uma 4.000 iha tinan 2020 iha Dili, no mós Primeiru-Ministru husu ona ba Autoridade Munisipál sira atu aprezenta dadus kona-ba uma ne’ebé sei taka ho duut nune’e bele tama mós iha planu ida ne’e.

Nia informa mós katak planu dezenvolvimentu iha tinan 2020, Governu hili Munisípiu Baucau ho Bobonaro, no iha Bobonaro sei konsentra hosi Batugade mai to’o Atabae.

Jornalista: Cipriano Colo

Editór: Xisto Freitas

Lee mós

PM Husu MAE Halo Proposta Hadi’a Estrutura Munisipál

Governu Planea Sei Harii Uma Unidade 2000 to´o 4000

PM Taur Sensibiliza Programa Governu 2020-2023 ba Komunidade Aileu

HAKEREK NO HATÁN

Please enter your comment!
Please enter your name here