Espoza Prezidente Repúblika, Cidália Nobre Lopez Mouzinho Guterres oferese prenda ba estudante Eskola Infantil no Primária Ailok Laran Atabae. Imajen Tatoli/Cipriano Colo

ATABAE, 27 jullu 2019 (TATOLI)—Espoza Prezidente Repúblika (PR), Cidália Nobre Lopez Mouzinho Guterres, apela ba inan-aman sira atu kontinua sai mestre no katekista ba oan sira iha uma.

Apelu ne’e Cidália fó sai durante semináriu ho tema, “motivasaun kona-ba kna’ar inan no aman atu eduka oan Sira”, ne’ebé organiza hosi Irman sira hosi kongregasaun Suster Misi Abdi Roh Kudus ne’ebé koñesidu ho “S.Sp.S.“, sigla hosi lian latina “Servae Spiritus Sanctus, iha Ailok Laran, Aldeia Tasi Mean, Suku Aidaba Leten, Postu Administrativu Atabae, Munisípiu Bobonaro, sábadu (27/7).

Cidália husu ne’e tanba haree ba realidade ohin loron, tama iha era modernizasaun, ema hotu moris ho dezenvolvimentu teknolojia, hamosu efeitu barak ba sosiedade liliu hamihiis morál ema-nian, foinsa’e sira,  ikus mai mosu problema sosiál barak, hanesan soe bebé, droga, abortu, seksu livre, krimi fíziku no seluk-tan.

Lee mós:

Kazu Soe Bebé, PPN Husu Judisiál Fó Justisa Ho Justu

Soe Bebé, Rede Feto Konsidera Falta Morál

PJR Esklarese Polémika Kazu Soe Bebé Ba Prezidente Repúblika

Espoza Prezidente Repúblika ne’e, fó hanoin mós katak, ohin loron, realidade hatudu katak, inan aman barak mak la preokupa ona ho oan sira, tanba preokupa liu ho serbisu no seluk-tan, hodi husik oan sira abandonadu no barak liu-tan mak lakon sira nia estudu.

Situasaun ne’e mós sai hanesan fatór ida ne’ebé bele kontribui ba hamosu problema iha sosiedade, tanba oan sira husik ransu livre, moris aat ne’ebé ikus mai halo sosiedade la hakmatek.

Tanba ne’e, inan-aman nia responsabilidade maka hahú kedas hosi inan nia knotak, oan ne’e tenke hetan formasaun integradu kontinua, katak, la’ós formasaun iha hahalok de’it, maibé hanesan ema fiar na’in, presiza mós formasaun ida espirituál.

Iha fatin hanesan, Diretora Escola Básica Filial Espírito Santo Atabae, Madre Maria da Graça Maia agradese ba espoza Prezidente Repúblika ne’ebé ho disponibilidade tomak, ho liafuan simples ho esperiénsia moris, nu’udar inan ba nasaun no inan ba oan na’in haat, bele lori motivasaun ba komunidade ida ne’e liliu ba joven sira iha Atabae.

Liafuan motivasaun ne’ebé espoza PR fó, madre ne’e prometidu sei uza hanesan edukasaun kontinua iha eskola refere.

Madre mós agradese tanba dala barak Atabae oan sira gosta halo problema, nune’e ho lia menon sira hosi Espoza Prezidente Repúblika hein katak bele kontribui ba hamenus hahalok hirak ne’e.

Atividade ne’e sai ona hanesan tradisaun ida iha komunidade Irman sira hosi Kongregasaun SSPS Atabae, ne’ebé hala’o kada tinan dala ida, hamutuk ho família sira, atu haree asuntu ka problema moris nian ne’ebé relevante ho situasaun atuál, oinsá buka solusaun.

Aleinde semináriu, madre sira mós organiza espozisaun kona ba hahán lokál ne’ebé prepara hosi inan-aman hosi estudante sira no mós inan-aman irman sira nian.

Iha oportunidade ne’e, Espoza Prezidente Repúblika mós oferese prenda ba estudante eskola Infantil no Primária Ailok laran.

Partisipante iha semináriu ne’e, Diretór Hospital Nacional Guido Valadares, dr. Aniceto Barreto ho Xefe Departamentu Cirurgia HNGV, dr. Alito Soares, fahe mós informasaun kona-ba moris família, ba prevensaun kaben sedu, moras hada’et, kanrku susun no sosializasaun.

Aleinde ne’e, partisipa mós hosi Prezidete Autoridade Munisípiu Bobonaro, Komandante Polísia Nasionál Timor-Leste Munisípiu Bobonaro, Pároku Parókia Atabae, madre sira, autoridade lokál sira, profesór sira, estudante no komunidade.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here