Eletrisidade. Ilustrasaun

COVALIMA, 26 jullu 2019 (TATOLI)—Administradór Postu Administrativu Suai Vila, ohin, informa katak maske tinan ida ne’e Governu Timor-Leste komemora loron Konsulta Populár ba dala 20 maibé populasaun 5134 husi Suku Beco, to’o oras ne’e moris iha nakukun laran no seidauk sente ukun rasik-án ninia benefísiu.

Administradór Postu Administrativu Suai Vila, Laurentino de Jesus. Foto TATOLI: Tomé Amado

“Sira husu mai ha’u atu haree mós kondisaun sira-nian. Kona-ba eletrisidade, Suku Beco ho ninia aldeia hamutuk 11 ne’e kontinua moris iha nakukun laran. Entaun, ha’u mós hato’o ona problema ne’e ba administradór atu haree liután kestaun ne’e,” dehan Administradór Postu Administrativu Suai Vila, Laurentino de Jesus, ba Ajénsia TATOLI iha Postu Administrativu Suai Vila, sesta (26/07/2019).

Nia hatutan, nu’udar autoridade lokál sei la nonook hodi buka alternativu seluk atu trata kondisaun Suku Beco bele asesu naroman [eletrisidade] hanesan Suku Luro, Camnasa, Labarai, Debos no Suku Suai Loro ne’ebé asesu ona ba fasilidade eletrisidade inklui estrada no bee-moos.

Administradór Postu Administrativu Suai Villa, populasaun Suku Beco la’ós la asesu de’it ba eletrisidade maibé sira mós labele asesu ba estrada no bee-moos. Maske nia hato’o ona proposta ba diresaun Instituto de Gestão do Equipamento (IGE.IP) atu apoiu ekipamentus eskavator hodi loke Estrada ba Aldeia Halek iha Suku Beco maibé to’o agora seidauk hetan solusaun.

“Hafoin estadu loke auto estrada (jalan tol) iha Suai, fó impaktu boot ba populasaun Aldeia Halek tanba labele ona atravesa atu lori sira-nia sasán ba fa´an iha merkadu. Iha tempu udan, populasaun sira ne’e tenke hakur mota tanba laiha ponte ne’ebé fasilita sira atu halo sira-nia atividade fa´an no sosa,” nia esplika.

Tuir dadus 2019 nian, nia haktuir, Postu Administrativu Suai Vila rejista populasaun suku Beco hamutuk 5134, Suku Camnasa totál populasaun hamutuk ema 7784, Suku Debos hamutuk ema 8119, Suku Labarai hamutuk ema 3117 no Suku Suai Loro hamutuk ema 400.

Jornalista   : Tomé Amado

Editór         : Rafy Belo

HAKEREK NO HATÁN

Please enter your comment!
Please enter your name here