Membru Unidade Polisia Militár (PM) FALINTLL-Forsa Defeza Timor-Leste (F-FDTL), hahú hamoos ona fo’er iha área serimónia dada bandeira iha Tasi Tolu, Dili, sesta (26/07/2019). Imajen/Antonio Gonçalves

DILI, 26 jullu 2019 (TATOLI)- Membru Unidade Polisia Militár  (PM) FALINTLL-Forsa Defeza Timor-Leste (F-FDTL), ohin, tuku 7:30 dadeer, hahú hamoos  ona fo’er iha área serimónia dada bandeira iha Tasi Tolu, Dili.

Programa limpeza ne’e hala’o hodi kontribui ba ambiente ne’ebé moos hodi prepara selebra festa Konsulta Populár  ba dala-20 (30 Agostu 1999-30 Agusto 2019) no marka mós aniversáriu Forsa Internasionál iha Timor-Leste (INTERFET-sigla Inglés).

Antes ne’e, Komandante Unidade Polisia Militár, Majór Abel da Costa Xavier “NIKI” informa, membru Polisia Militár prontu atu apoiu estadu realize programa limpeza nu’udar atividade importante  hodi koopera ho autoridade Dili tomak  hamoos fo’er iha kada bairru inklui área Tasi Tolu nian hodi kontribui ambiente moos.

Tuir observasaun Ajénsia Tatoli  iha terrenu nota katak alende halo limpeza, ekipa Jestór Munisípiu Dili mós hahú muda sai ona negosiante ambulante sira ne’ebé loke atividade kiós iha área uma adat Tasi Tolu nian.

Iha Kampu Tasi Tolu mós komesa harii ona rede hale’u fatin selebrasaun inklui harii mós tenda ba festa konsulta popular nian.

Alende ida ne’e, kompañia nasionál sira hahú hadi’a ona estrada Tasi Tolu nian ne’ebé sei tau alkatraun kompletu molok selebra festa konsulta popular ne’ebé sei partisipa hosi xefe estadu no xefe governu nasaun viziñu inklui bainaka internasionál sira.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here